Qazaqstanda jyl saıyn 12 myń tonna teńiz balyqtary aýlanbaı qalady
ASTANA. QazAqparat - Qazaqstanda jyl saıyn 12 myń tonna teńiz balyqtary túrlerin aýlaý lımıti paıdalanylmaıdy. Bul týraly búgin QR Aýyl sharýashylyǵy vıtse-mınıstri Erlan Nysanbaev málim etti, dep habarlaıdy "QazAqparat".
«Salanyń damýyn tejep otyrǵan problemalardyń biri teńizde balyq aýlaýmen baılanysty bolyp otyr. 12 myń tonnaǵa jýyq teńiz balyqtary túrlerin aýlaý lımıti jyl saıyn paıdalanylmaıdy. Sebep - teńiz balyq aýlaý flotynyń jetkilikti dárejede damymaýy. Kásipkerler dızel otynyn satyp alýǵa kóp shyǵyndanatyndyqtaryna shaǵymdanady. Sonymen birge tirkeý portyna kirip-shyǵý qıyndatyp jiberilgen», - dedi Nysanbaev.
Onyń aıtýynsha, jańa balyq aýlaý floty qymbattylyǵyna jáne teńiz floty bilimi bar otandyq mamandardyń bolmaýy saldarynan satyp alynbaı otyr. Al, teńizde balyq aýlaý lımıtin tolyq ıgerý úshin 4,4 mlrd. teńgege jýyq ınvestıtsııa qajet.
«Osy baǵytta memlekettik-jeke áriptestikti damytýdy josparlap otyrmyz», - dedi Nysanbaev.
Aıta keteıik, Májilistiń Agrarlyq máseleler komıtetinde elimizdegi balyq sharýashylyǵynyń jaǵdaıy jáne damý máseleleri talqylanýda.
