Qazaqstanda jyl saıyn 1 tonnadan astam aýǵan geroıni tárkilenedi - S.Kúsetov
ALMATY. QazAqparat - Qazaqstanda jyl saıyn 1 tonnadan astam Aýǵanstannan jetkiziletin geroın tárkilenedi. Bul týraly búgin Almatyda Qazaqstan, Qyrǵyzstan, Tájikstan jáne Ózbekstannyń esirtkige qarsy vedomstvo basshylarynyń jumys kezdesýi barysynda QR ІІM Esirtki bıznesine qarsy kúres departamentiniń basshysy, ádilet general-maıory Sultan Kúsetov málimdedi.
«Ókinishtisi, Aýǵanstannan jetkiziletin geroınniń kólemi azaıdy dep aıta almaımyz. Ol jetkizilip jatyr. Biz jyl saıyn 1 tonnadan astam aýǵan geroınin tárkileımiz. Esirtki tasymaldaýshylar bizdiń eldi negizinen tranzıttik maqsatta paıdalanatyny belgili. Árqashan da osylaı bola beredi. Biz olardy shekaramyz arqyly ótýge jol bermeý úshin tıimdi sharalar qoldanýymyz qajet», - dedi S. Kúsetov.
Sonymen qatar ol sońǵy jyldary esirtki tasymaldaýshylar teńiz jolyn da paıdalana bastaǵanyn jetkizdi.
«Ótken jyly Qazaqstannyń shekarasyna teńiz arqyly kelip jetken júkti tekserý barysynda odan 118 keli aýǵan geroıni tárkilendi. Endi esirtki tasymaldaýshylar bizdiń elge qurlyq jolyn qoıyp, teńiz arqyly da kele bastady. Biz buǵan árqashanda daıyn bolýymyz kerek», - dedi S. Kúsetov.
