Qazaqstanda jyl kitaby belgili boldy
Atalǵan sharaǵa qatysqan QR UǴA akademıgi Ǵarıfolla Esim, jazýshy, QR Parlamenti Senatynyń depýtaty Jabal Erǵalıev, Mádenıet jáne sport mınıstrligi Mádenıet jáne óner isteri departamentiniń basqarma basshysy Bazarbaı Altaev, aqyn, QR Jazýshylar Odaǵy Astana qalalyq fılıalynyń tóraǵasy Nesipbek Aıtuly, fılologııa ǵylymdarynyń doktory, professor Tursyn Jurtbaı, «Astana aqshamy» gazeti bas redaktorynyń birinshi orynbasary Talǵat Batyrhan jáne basqa da qoǵam qaıratkerleri men elimizdiń ár oblysynan kelgen kitaphana dırektorlary biraýyzdan «Kóshpendilerdi» tańdap, daýys berdi.
Aıta keteıik, aktsııa aıasynda QR Ulttyq akademııalyq kitaphanasyndaǵy, QR Ulttyq kitaphanasyndaǵy, oblystyq, aýdandyq jáne aýyldyq kitaphanalardaǵy, Astana qalasyndaǵy Ortalyqtandyrylǵan kitaphanalar júıesindegi, sondaı-aq, elordadaǵy bilim berý mekemelerindegi daýys berý qorytyndysy boıynsha 2015 jylǵy tańdaýǵa mynadaı kitaptar usynylǵan bolatyn:
І. Esenberlınniń «Kóshpendiler» romany; B. Momyshulynyń «Ushqan uıa», «Moskva úshin shaıqas» shyǵarmalary; Qadyr Myrza-Álıdiń shyǵarmalary; Muhtar Maǵaýınniń «Qazaq tarıhynyń álippesi», «Bir atanyń balalary», «Alasapyran» tarıhı romany; Jumeken Nájimedenovtiń «Aq shaǵyl», «Dańq pen daqpyrt», «Kishkentaı» shyǵarmalary; Ǵabıt Músirepovtiń «Qazaq soldaty» romany; Tumanbaı Moldaǵalıevtiń «Júrektegi jazýlar» óleńder jınaǵy; Abaıdyń óleńderi; Qasym Qaısenovtiń «Jaý tylyndaǵy bala» áńgimesi; Tólen Ábdiktiń «Tuǵyr men ǵumyr» hıkaıaty, «Parasat maıdany» povesi.
«Bul tizimge Abaıdyń óleńderi belgili sebeptermen keıinirek qosyldy. Degenmen, Abaıdy bilmeıtin qazaq joq. Sondyqtan kópshiliktiń tańdaýy І. Esenberlınniń «Kóshpendilerine» aýyp otyr», - dep túsindirdi komıssııa tóraǵasy Ǵ. Esim.
Endi bir jyl boıy atalǵan roman elimizdiń barlyq kitaphanalary men mektepterinde dáriptelip, oqyrman qaýymǵa keńinen nasıhattalatyn bolady.