Qazaqstanda jyl basynan kıik brakonerligine qatysty 56 derek anyqtaldy

NUR-SULTAN. QazAqparat – 2021 jyldyń basynan beri Qazaqstan aýmaǵynda 56 kıik brakonerligi anyqtaldy. Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń orynbasary Danııar Turǵambaev aıtyp berdi, dep habarlaıdy QazAqparat tilshisi.

«Brakonerlikti anyqtaý jáne jolyn kesý jumystaryn kúsheıtý maqsatynda jyl saıyn bizdiń mınıstrliktiń, ІІM men UQK-niń birlesken buıryǵymen kóktemgi jáne qysqy kezeńderde aýqymdy «Kıik» tabıǵat qorǵaý aktsııasyn ótkizý jospary bekitiledi. Osy naýqan aıasynda aldyn alý is-sharalary jandandyryldy, kıikter brakonerligine, olardyń derıvattaryn jáne Qazaqstan aýmaǵyndaǵy jabaıy faýnanyń basqa da túrlerin ótkizýge jáne satyp alýǵa mamandanǵan birqatar qylmystyq toptardyń joly kesildi. Jyl basynan beri ınspektorlar kıik brakonerliginiń 56 faktisin anyqtady, 4077 múıiz ben 141 kıiktiń ushasyn tárkiledi», - dedi D. Turǵambaev Ortalyq kommýnıkatsııalar qyzmetinde ótken baspasóz máslıhatynda.

Degenmen, spıkerdiń aıtýynsha barlyq qabyldanyp jatqan sharalarǵa, brakonerlik úshin qylmystyq jaýapkershiliktiń qatańdaýyna qaramastan, brakonerlik faktileri tyıylmaı otyr.

«Kıikterdi saqtaý maqsatynda 2020 jyly ǵylymı maqsattarda paıdalanýdan basqa, kıikterdi, olardyń bólikteri men derıvattaryn respýblıkanyń búkil aýmaǵynda paıdalanýǵa tyıym salý engizildi. Qazirgi ýaqytta Oral popýlıatsııasynyń kıikterin saqtaý maqsatynda Batys Qazaqstan oblysynyń Qaztalov, Jánibek, Bókeı Orda jáne Jańaqala aýdandarynyń aýmaqtaryn qamtıtyn «Bókeıorda» memlekettik tabıǵı rezervatyn qurý máselesi pysyqtalýda. Sondaı-aq, Batys Qazaqstan oblysynyń Jánibek jáne Qaztalov aýdandarynyń aýmaǵynda respýblıkalyq mańyzy bar Aşyózek memlekettik tabıǵı qaýmalyn qurý jobasy ázirlendi», - deıdi D. Turǵambaev.

Sonymen birge, janýarlar dúnıesin qorǵaý, esepke alý jáne monıtorıng tetikterin, onyń ishinde pılotsyz ushý apparattaryn qoldana otyryp, qaıta qaraý, GPS-trekerlerdi paıdalaný, ınspektorlardy tóske taǵatyn beıneojetondarmen jaraqtandyrý josparlanýda.