Qazaqstanda jyl basynan beri jol-kólik oqıǵalarynyń sany 3,6 paıyzǵa tómendedi - ІІM
ASTANA. QazAqparat - Elimizde 2014 jyldyń 8 aıynda oryn alǵan jol-kólik oqıǵalary 3,6 paıyzǵa tómendedi. Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda Іshki ister mınıstrligi Ákimshilik polıtsııa komıtetiniń tóraǵasy Igor Lepeha málim etti.
Sonymen qatar komıtet basshysynyń aıtýynsha, jyl basynan beri jol-kólik oqıǵalarynan bolatyn ólim kórsetkishi de 14 paıyzǵa azaıyp, qaıtys bolǵandar sany 252 adamdy quraǵan. Al jol apatynan jaraqat alý 5,5 paıyzǵa tómendegen.
«Jalpy statıstıkalyq kórsetkishter elimizdiń joldaryndaǵy jaǵdaıdyń qalypty ekenin kórsetedi. Sonymen qatar eger biz jol-kólik oqıǵasy boıynsha aýrýhanaǵa túskennen keıingi 7 kúnniń ishinde qaıtys bolǵan adamdardy esepke alyp kelsek, qazir osyndaı oqıǵalar saldary 30 táýliktik merzim boıynsha tekserilip, tirkeledi. Sosyn japa shekkenderge kelsek, qazirgi kúni eger oqıǵa boıynsha saýsaǵynyń ushyna ǵana ıod jaǵyp, basqa medıtsınalyq kómek múldem qajet etilmeıtin bolsa da, ol adamdardy «jaraqat alǵandar» sanatyna jatqyzyp kelemiz. Máselen, byltyrǵy jyly jol-kólik apatynan jaraqat alǵan 30 myń adamnyń 13 myńǵa jýyǵyna sol orynda azǵantaı kómekter kórsetilip, qaıtaryldy. Buǵan deıin ondaı azamattar jaraqat alǵandar sanatyna jatqyzylmaıtyn edi», - deıdi I.Lepeha.
