Qazaqstanda jyl basynan beri kópbalaly otbasylar 110,1 mlrd teńge járdemaqy aldy

NUR-SULTAN. QazAqparat - Jyl basynan beri kópbalaly otbasylarǵa beriletin memlekettik járdemaqy tólemderimen orta eseppen 495,8 myń otbasy qamtyldy, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Onyń ishinde naýryz aıynda 503,8 myń otbasyna 27,9 mlrd teńge járdemaqy tólendi.

Bul memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deıingi kúndizgi bólimde oqıtyn stýdent balalary bar otbasylar tabysyna qaramastan úmitker bola alady.

Tólem mólsheri bala sanyna qaraı eseptelip tólenedi. Kópbalaly otbasylaryndaǵy ár balaǵa 12 525 teńge qarastyrylǵan. 4 balaǵa – 49 100 teńge, 5 balaǵa – 61 383 teńge, 6 balaǵa – 73 666 teńge, 7 balaǵa – 85 948 teńge, 8 balaǵa – 98 016 teńge, 9 balaǵa – 110 268 teńge, 10 balaǵa – 122 520 teńge, 11 balaǵa – 134 772 teńge, 12 balaǵa – 147 024 teńge, 13 balaǵa – 159 276 teńge, 14 balaǵa – 171 528 teńge, 15 balaǵa – 183 780 teńge, 16 balaǵa – 196 032 teńge tólenedi.

Eske salaıyq, kópbalaly otbasylarǵa olardyń tabysyn esepke almaı beriletin memlekettik járdemaqy Qazaqstanda 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde kózdelgen tabysy az jáne kópbalaly otbasylardy qoldaýdyń úsh negizgi baǵyty aıasynda engizilgen.