Qazaqstanda jyl basynan beri 9,8 mln sharshy metr turǵyn úı paıdalanýǵa berildi

NUR-SULTAN. QazAqparat - Qazaqstanda bıylǵy jyldyń 10 aıynda 9,8 mln sharshy metr turǵyn úı paıdalanýǵa berildi. Bul týraly QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat.

«10 aıdyń qorytyndysy boıynsha 9,8 mln sharshy metr turǵyn úı paıdalanýǵa berildi, bul 2018 jylǵy osy kezeńdegi kórsetkishti 100% quraıdy. Turǵyn úıdi iske qosý paıyzy jyldyq josparǵa 75,4% qurady. Respýblıka boıynsha barlyǵy 84 580 turǵyn úı tapsyryldy», - dep atap ótti mınıstr 10 aıdaǵy áleýmettik-ekonomıkalyq damý qorytyndysy boıynsha QR Úkimeti otyrysynda.

Turǵyn úı kóleminiń ulǵaıý kórsetkishteri elimizdiń 9 óńirinde baıqalady. Bul tizimde Túrkistan (130,4%), Qyzylorda (117,2%), Aqtóbe (116,7%) Qostanaı (115,9%) oblystary jáne Shymkent qalasy (116,4%) kóshbasshy bolyp otyr.

Alaıda, buǵan qaramastan, vedomstvo basshysy turǵyn úıdi iske qosý boıynsha qurylys qarqynynyń keıbir tómendeýi týraly da aıtyp berdi.

«Turǵyn úıdi iske qosý qarqynynyń tómendeýi Jambyl oblysynda (96,0%) jáne Nur-Sultan qalasynda (64,2%) baıqalady. Jyldyq josparǵa (105,0%) qol jetkizý boıynsha qabyldanǵan mindettemelerdi oryndaý úshin osy ákimdikter óz jumysyn jandandyrýy qajet. Jalpy, jyl qorytyndysy boıynsha Mınıstrlik jetekshilik etetin barlyq salalar boıynsha NKI josparly mánderine qol jetkizý josparlanyp otyr», - dep atap ótti B. Atamqulov.