Qazaqstanda jyl basynan beri 700 memqyzmetshi jemqorlyqpen ustalǵan

ASTANA. QazAqparat - 2018 jyldyń basynan beri joǵary shendi 700 laýazymdy tulǵanyń qatysýymen jemqorlyq faktileri áshkerelendi. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev vedomstvo alqasynyń keńeıtilgen otyrysynda málim etti, dep habarlaıdy QazAqparat tilshisi. 

«Barlyq salada joǵary shendi laýazymdy tulǵalardyń qatysýymen jemqorlyqtyń júıeli faktileri áshkerelendi deýge bolady. Ótken jyldyń ishinde 700 tulǵa, sonyń ishinde 18 respýblıkalyq, 95 oblystyq, 101 qalalyq jáne aýdandyq deńgeıdegi basshylar ustaldy. Olardyń ishinde energetıka vıtse-mınıstrleri, syrtqy saıası vedomstvolardyń jaýapty hatshylary, Aýyl sharýashylyǵy mınıstrligi komıtet tóraǵalary men orynbasarlary, ulttyq kompanııalardyń top-menedjerleri, quqyq qorǵaý organdarynyń basshylary, sondaı-aq túrli deńgeıdegi sýdıalar bar», - dedi A.Shpekbaev.

Onyń aıtýynsha, 2018 jyldyń basynan beri Ońtústik Qazaqstan oblystyq jáne Almaty qalalyq memlekettik kirister departamentiniń laýazymdy tulǵalary, Aqmola jáne Mańǵystaý oblystyq ishki ister organdary qyzmetkerleriniń qatysýmen qylmystyq toptar anyqtalǵan.

Budan bólek, A.Shpekbaevtyń málimetinshe, Agenttik 300-den astam kásipkerdiń quqyǵyn qorǵaǵan. Bul 2017 jylǵy kórsetkishten úsh ese joǵary.

Agenttik tóraǵasy qoldanylǵan sharalardyń nátıjesinde bekitilgen zalaldyń somasy 9,7 mıllıard teńgege ósip, 2017 jyldyń birinshi jarty jyldyǵynan 4 mıllıard teńgege artyq bolǵan. Zalaldyń ótelýi 8,5 mıllıard teńgeni qurady. Bul ótken jyldyń birinshi jarty jyldyǵymen salystyrǵanda, 68 protsentke joǵary. Tergeý barysynda kúdiktilerdiń 4,6 mıllıard teńge somasyndaǵy múlkine toqtam salyndy. Bul byltyrǵyǵa qaraǵanda 4 ese kóp.

Sondaı-aq, Memleket basshysynyń tapsyrmasyna sáıkes, qylmystyq protsesti azaıtý sharalary qoldanylyp jatyr. Ustalýshylar men qamaýǵa alynǵandar sany 2 esege qysqarǵan.