Qazaqstanda jyl basynan beri 39 brakonerlik faktisi anyqtaldy- Ekologııa mınıstrligi
Mınıstrlik taratqan málimetterge qaraǵanda, brakonerlerden 1571 aqbóken múıizi men 513 janýardyń tutas eti alyndy. Ótken jylmen salystyrǵanda, mundaı oqıǵalar sany aıtarlyqtaı ósken (25 brakonerlik faktisi, 530 múıiz ben 650 tutas et alyndy).
«Bul memlekettik organdardyń qylmystyq toptardyń jolyn kesýdegi jumys úılesimdiligi men ózara is-qımyl jedeldiginiń nátıjesi deýge bolady»,-delingen habarlamada.
Sondaı-aq baspasóz qyzmetiniń málimetterine qaraǵanda, jalpy alǵashqy jartyjyldyqta memlekettik ınspektorlar tabıǵatty qorǵaý zańnamasyn buzýdyń 3 748 oqıǵasyn anyqtady. Úsh myńnan astam adam ákimshilik jaýapqa, 12 brakoner qylmystyq jaýapqa tartyldy. Bul rette jalpy aıyppul somasy 44 mln teńge, zalal somasy 1,6 mlrd. teńgeni qurady.
«Ótken jylǵy osy kezeńdi salystyrý úshin alsaq, 4 197 oqıǵa anyqtalyp, ákimshilik jaýapqa 3 335 adam, qylmystyq jaýapqa 19 adam tartylǵan. Ol kezdegi jalpy aıyppul somasy 45,6 mln teńge, zalal somasy 870 616,2 myń teńgeni qurady»,-delingen mınıstrlik taratqan aqparatta.
