Qazaqstanda jyl basynan beri 2000-ǵa jýyq qoqys oryndary anyqtaldy

NUR-SULTAN. QazAqparat - Ruqsat etilmegen qoqys tastaıtyn oryndar turǵyndar men memlekettik organdardyń 60 %-ynyń nazaryn aýdaryp otyrǵan problemaǵa aınaldy, dep habarlaıdy QazAqparat.

Ekologııa, geologııa jáne tabıǵı resýrstar mınıstrligi baspasóz qyzmetiniń málimetinshe, jyl basynan beri 2000-ǵa jýyq qoqys oryndary anyqtalǵan.

«Bul túıtkilmen kúresý úshin ІІM jáne jergilikti atqarýshy organdarmen birlesip qoqys tastaıtyn jerlerdi joıý boıynsha úshjaqty is-sharalar jospary bekitildi. Soǵan sáıkes, Qazaqstannyń birqatar óńirinde qaldyqtardy zańsyz tógý oryndaryn anyqtaý boıynsha reıdter ótti. Máselen, mamyr aıynda respýblıka aýmaǵynda 31 reıd jasadyq. Munda Atyraý, Qyzylorda, Aqmola, Almaty, Batys Qazaqstan, Soltústik Qazaqstan, Qostanaı, Qaraǵandy oblystaryn, sondaı-aq Almaty, Nur-Sultan jáne Shymkent qalalaryn qamtydyq», - dep jazdy vedomstvodan.

Nátıjesinde 150-ge jýyq ruqsat etilmegen qoqys oryndary anyqtalǵan. 14 derekke qatysty (bul shamamen 88 qaldyq nysany) ÁQBtK-niń 344-baby boıynsha 153 myń teńge mólsherinde aıyppul salyndy. 20-dan astam qaldyqtar sol jerde joıyldy.

Qoqys tastaıtyn oryndardy anyqtaý sharalary jalǵasatyn bolady.