Qazaqstanda jyl basynan 246 balada qaterli isik anyqtaldy
«2018 jyldyń alǵashqy 6 aıynda 246 balada qaterli óskinder paıda bolǵan, onyń 113-inde - aqqan aýrýy, 133 balada lımfoma men úlken isikter anyqtaldy», - dep jaýap berdi QR Densaýlyq saqtaý mınıstrligi Medıtsınalyq kómekti uıymdastyrý departamentiniń ana men bala basqarmasy redaktsııanyń saýalyna.
Sondaı-aq, mınıstrlik Qazaqstanda jyl saıyn shamamen 600 bala qaterli isik aýrýlaryna shaldyǵatynyn atap ótti.
«2017 jyldyń 12 aıynda 610 balada qaterli óskin tabylǵan, onyń 230-ynda aqqan aýrýy, 374-inde isik bolǵan. 2016 jyly 510 balada qaterli isik anyqtalǵan edi», - dep habarlady mınıstrlikten.
Mamandar balalarǵa qoldanylyp jatqan em-domdardyń jańa tásilderimen de bólisti.
«25 jyldan astam ýaqyt boıy BFM nemis baǵdarlamasy qoldanylyp keledi. Baǵdarlama aıasynda lımfoblasty aqqan aýrýynan aıyqqan balalar sany - 76,3% deıin, al mıeloblasty aqqan aýrýynan jazylǵan balalar sany 42% deıin kóterilgen. Intensıvti emdeýden soń, remıssııaǵa ketken naýqastar sany jyldan-jylǵa artyp keledi. 2016 jyly - 1866 bala, 2017 jyly 2000-nan astam bala dertten aıyqty», - delingen mınıstrlik jaýabynda.
Densaýlyq saqtaý salasynyń sarapshylary 2012 jyldan bastap, balalardyń polıhımııalyq terapııanyń zamanaýı joǵary dozaly baǵdarlamalary boıynsha emdelip jatqanyn habarlady. Saraptama nátıjesine sáıkes, terapııa tıimdiligi 66,9% quraǵan, onyń arasynda retınoblastoma (96%), osteosarkoma (91,7%), nefroblastoma (82,4%), germınogendi-jasýshalyq isikter jáne Hodjkın lımfomalary (75%) anaǵurlym tıimdirek emdelgen.
«Aýrýdyń erterek anyqtalýy terapııa nátıjelerine yqpal etedi. 2017 jyly túrli isikter men lımfomalar 374 balanyń 108-inde І-ІІ satyda, 266 balada - III-IV satyda anyqtalǵan edi. Qaterli isikti І-ІІ satyda anyqtaý kórsetkishi 37%-ten (2016 j) 38,2%-ke (2017 j) kóterildi», - dep habarlady Densaýlyq saqtaý mınıstrliginen.