Qazaqstanda jyl basynan 12 halyqaralyq áýe marshrýty ashyldy
ASTANA. QazAqparat - 2018 jyldyń alty aıynda Qazaqstanda áýe kemelerimen 3,8 mln adam tasymaldandy, dep habarlaıdy QazAqparat tilshisi.
QR Investıtsııalar jáne damý mınıstri Jeńis Qasymbek búgin Astanadaǵy Ortalyq kommýnıkatsııalar qyzmetinde ótken baspasóz máslıhatynda atap ótkendeı, azamattyq avıatsııa salasynda jolaýshylar aǵynynyń turaqty ósim qarqyny saqtalýda. Aǵymdaǵy jylǵy alty aıda tasymaldanǵan áýe jolaýshylarynyń ósimi 19% nemese 3,8 mln adamdy qurady (2017 jyly 3,2 mln adam).
Onyń aıtýynsha, Qazaqstannyń halyqaralyq baǵyttarǵa ushý geografııasy jyl sanap keńeıe túsýde.
«Byltyr jańadan 10 halyqaralyq áýe qatynasy ashyldy. Bıyl jyl basynan beri 12 halyqaralyq marshrýt iske qosyldy. Onyń ishinde qazaqstandyq áýe tasymaldaýshylar Atyraý-Frankfýrt, Astana-Qazan, Astana-Túmen, Astana-Vılnıýs, Astana-Chelıabi, Astana-Krasnodar, Astana-Tomsk, Astana-Sochı baǵyttaryn oryndaıdy. Sondaı-aq sheteldik tasymaldaýshylar oryndaıtyn Rıga-Almaty («AirBaltic»), Novosıbırsk-Pavlodar («Sıbır»), Krasnoıarsk-Almaty («Angara»), Máskeý-Qyzylorda («Aeroflot») jańa áýe marshrýttary ashyldy», - dep atap ótti J.Qasymbek.
Mınıstrliktiń málimetinshe, sonymen qatar elimizdiń kólik salasy da ósim dınamıkasyn kórsetip otyr. Buǵan dálel ótken jyly júk tasymaldaý kólemi 6,4% ósip, 1,8 mlrd tonnany qurady. Bıylǵy alty aıdyń qorytyndysy boıynsha tranzıttiń jalpy kólemi 8,5 mln tonnaǵa jetti. Bul 2017 jyldyń sáıkes kezeńindegi kórsetkishten 9% artyq.
