Qazaqstanda jyl aıaǵyna deıin balabaqshalarda qosymsha 24 500 oryn ashylady - QR Bilim jáne ǵylym mınıstri
ASTANA. Qarashanyń 21-i. QazAqparat - Qazaqstanda jyl sońyna deıin balabaqshalarda 24 500 qosymsha oryn ashylady. Bul týraly Úkimet úıindegi Qazaqstan Respýblıkasynyń Premer-Mınıstri Kárim Másimovtiń tóraǵalyǵymen Memleket basshysynyń tapsyrmalaryn oryndaý máselelerine qatysty ótken selektorlyq keńeste QR Bilim jáne ǵylym mınıstri Janseıit Túımebaev baıandady.
Mektepke deıingi mekemeler jelisin damytý máseleleri boıynsha QR Bilim jáne ǵylym mınıstri J.Túımebaev, Astana qalasy ákiminiń orynbasary Sergeı Horoshýn jáne Almaty qalasy ákiminiń orynbasary Máýlen Muqashev baıandama jasady.
Baıandamashylar Astana jáne Almaty qalalarynda jáne elde mektepke deıingi tárbıeleý mekemelerin jáne qosymsha oryndardy ashýǵa baǵyttalǵan qysqa merzimdi jáne uzaqmerzimdi sıpattaǵy qolǵa alynǵan sharalar týraly baıandady.
J.Túımebaevtyń aqparaty boıynsha, 2010 jyly respýblıkada taǵy 74 300 oryndyq mektepke deıingi balalar mekemeleri ashylmaq.
Búgingi tańda mınıstrlik mektepke deıingi balalar mekemeleri úshin lıtsenzııa alýdy ońaılatýdy kózdeıtin Úkimet qaýlysynyń jobasyn jasady jáne ol qazir memlekettik organdarda kelisýden ótkizilýde. Mınıstrdiń buıryǵymen menshik nysanyna qaramastan mektepke deıingi uıymdarda memlekettik tapsyrysty ornalastyrý ádistemesi bekitildi.
Qazirde memlekettik organdar ornalasqan burynǵy balabaqsha ǵımarattaryn bosatý jóninde sheshim qabyldandy. 2010 jyly «Jol kartasy» aýqymynda bilim berý nysandaryn jóndeýde mektepke deıingi mekemelerge basymdyq berilmek.
Astana qalasy ákiminiń orynbasary S.Horoshýn qolǵa alynǵan sharalardyń nátıjesinde Astana qalasynda 2009 jyldyń sońyna deıin qosymsha 980 oryndyq 9 mektepke deıingi mekemeler iske qosylatynyn baıandady.
Budan basqa selektorlyq keńeste Qostanaı jáne Ońtústik Qazaqstan oblystarynyń ozat tájirıbesi qaraldy.
QR Bilim jáne ǵylym mınıstrligi men elorda ákimdigi usynǵan sharalardy talqylaǵannan keıin, sondaı-aq keńeske qatysýshylardan túsken usynystar boıynsha jaýapty adamdarǵa birqatar tapsyrmalar berildi.
