Qazaqstanda júzden astam adam ómir boıy bas bostandyǵynan aıyrylǵan
Bul týraly búgin QR Parlamenti Májilisinde ótken «Qazaqstan Respýblıkasynyń Qylmystyq kodeksiniń jańa redaktsııasynda kózdelgen ólim jazasy jáne ómir boıy bas bostandyǵynan aıyrý jaza túrleri» atty dóńgelek ústel otyrysy barysynda Zańnama jáne sot-quqyqtyq reforma komıtetiniń tóraǵasy Rahmet Muqashev aıtty.
«Bizder qoldanyp júrgen ólim jazasynyń balama túrine oılanatyn kez keldi. Qazaqstanda onyń balama túri - ómir boıy bas bostandyǵynan aıyrý. Qazirgi tańda jazanyń bul túrimen júzden astam adam sottalǵan» dedi ol.
Halyq qalaýlysynyń atap ótýinshe, mundaı jazaǵa kesilgenderdi ońaltý, olarǵa psıhologııalyq baǵa berý jumystaryn júrgizý qajet. Olardyń keıbiriniń shartty túrde merziminen buryn bosap shyǵý quqyǵy joq bolýy múmkin. Degenmen de olardyń barlyǵy da shartty túrde merziminen buryn bosap shyǵýǵa ótinish bere alady. Sondyqtan da sottalǵandardy bul iske aldyn ala daıyndaýdy bastaý kerek.
«Bul problemanyń basqa qyry shartty túrde merziminen buryn bosap shyǵý quqy joq 27 adam bolyp tur. Olardyń ólim jazasy ómir boıy bas bostandyǵyna aıyrýǵa ózgertilgen. Bul másele birneshe márte kóterildi. Kóptegen sarapshylar da, zańgerler de Qylmystyq kodekstiń qazirgi normasyna túzetý engizý qajettigimen kelisedi. Qylmystyq kodekstiń jańa redaktsııasyna oraı bul normany qaıta qaraıtyn ýaqyt jetti», - dedi R.Muqashev.
