Qazaqstanda júrýge yńǵaıly biregeı protez tanystyryldy
ALMATY. QazAqparat - Qazaqstanda adamnyń júrý ereksheligi boıynsha jasalatyn zamanaýı protez aıaq tanystyryldy, dep habarlaıdy QazAqparat tilshisi.
Almatydaǵy «Respýblıkalyq protez-ortopedııalyq ortalyq» AQ japon óndirisiniń erekshe ónimin usyndy.
Qazaqstanǵa protez jetkizetin Reseı mamany Mıhaıl Mıhaılovtyń aıtýynsha, protezdiń jańa túri naýqastarǵa úmit syılaıdy. Bul olarǵa aıaq-qoly saý adamdar sııaqty jumys isteýge, otbasyn qurýǵa, damýǵa, sportpen shuǵyldanýǵa múmkindik beredi.
«Zamanaýıı aıaq protezine jańa taban qoıyldy, ol aldyńǵy nusqalardan erekshe, onyń jilinshigi qozǵalmaly. Biregeı gıdravlıkalyq jilinshik fızıologııalyq tabıǵı baǵytqa jaqyndatady. Jańa protezder ınnovatsııalyq talshyqty shyny materıaldardan jasalǵan, olar berik jáne aýyr júktemelerge tótep bere alady », - dedi ol.
Jańa protezdi tanystyrý barysynda ortalyqtyń protezdeý tehnıgi jáne patsıenti Arman Ybraev onyń sapasyna joǵary baǵa berdi.
«Jańa protez modeli óte yńǵaıly, jyldam qozǵalady eken. Men shynymen de kádimgideı aıyrmashylyqty sezdim. Onymen júrý óte qolaıly. Bul meniń eski modeldegi aldyńǵy protezimnen áldeqaıda jaqsy eken», - deıdi Arman Ybraev.
Aıta ketý kerek, joǵary sapaly protezder Qazaqstanda respýblıkalyq protezdik-ortopedııalyq ortalyqta shyǵarylady. Kompanııa ártúrli jastaǵy naýqastarǵa arnalǵan protezdik-ortopedııalyq ónimderdi jasaıdy. Jyl saıyn ortalyq 30 myńnan astam protez ónimderin shyǵarady.
Ortalyqta qazir japondyq óndirýshilerdiń joǵary tehnologııalyq protezderi synaq rejıminde kórsetilip jatyr. Onyń qunyn jaqyn arada japondyqtar belgileıdi.
Búgingi tańda Qazaqstanda 49 703 adam protez qoldanýshy retinde tirkeýde tur. Bul kórsetkish únemi ózgerip otyrady. Ótken jyly 15170 adam protezdeý jáne ortopedııadan ótken. Olar protezderdi zańǵa sáıkes memleket esebinen tegin aldy.
