Qazaqstanda júrgizýshisiz kólikterdiń jolǵa shyǵý tártibi belgilendi

Іshki ister mınıstriniń 3 qarashadaǵy buıryǵymen Jol qozǵalysy qaǵıdalaryna birqatar ózgeris engizildi. Atap aıtqanda, velosıped, moped, kólik quraly jáne shaǵyn elektr kóligi uǵymdary naqtylandy.

Jańa qaǵıda boıynsha, shaǵyn elektr kóligine gıroskýter, sıgveı, elektrli skeıtbord pen monodóńgelek jatady. Al elektrli samokat pen elektr qozǵaltqyshy bar velosıped bul sanatqa kirmeıdi.

Eldi mekenderde jeńil kólikter saǵatyna 60 shaqyrymnan, avtobýstar men júk kólikteri 50 shaqyrymnan artyq jyldamdyqpen júrmeýi kerek. Turǵyn aımaqtar men aýlalarda saǵatyna 20 shaqyrymnan asyrýǵa bolmaıdy. Jol belgisinde ózgeshe shekteý kórsetilse, sol talap saqtalady. Degenmen eń joǵary jyldamdyq saǵatyna 90 shaqyrymnan aspaýǵa tıis.

Elektrli samokatpen velosıped jolymen nemese arnaıy jolaqpen júrý qajet. Ondaı jol bolmasa, joldyń oń jaq shetimen, qoǵamdyq kólik jolaǵymen nemese jol jıegimen qozǵalýǵa ruqsat etiledi.

Shaǵyn elektr kóligin tizgindegenderge de birqatar shekteý qoıylǵan. Atap aıtqanda, róli bar kólikti keminde bir qolmen ustap júrý kerek. Jolaýshy nemese júk tasýǵa, kólik júretin jolǵa shyǵýǵa, kólikti súıreýge bolmaıdy. Janynda velosıped joly bolsa, trotýarmen júrýge de ruqsat joq. Jaıaý júrginshiler ótkelinen kólikten túspeı ótýge bolmaıdy.

Júrgizýshisiz kólikter qaıda júredi?

Jańa erejede júrgizýshisiz kólikterge arnalǵan jeke taraý bar. Oǵan sáıkes, mundaı kólikter tek arnaıy belgilengen aýmaqta qozǵala alady. Ol aýmaqtyń shekarasy men kólik júretin baǵyty aldyn ala bekitiledi.

Qozǵalys baǵytyn jolǵa jaýapty mekeme nemese jergilikti atqarýshy organ ázirlep, jol qaýipsizdigine jaýapty organmen kelisedi. Onda kóliktiń qaı jolmen júretini, qaı jerden kirip-shyǵatyny, qaıda toqtaıtyny jáne qandaı jyldamdyqpen qozǵalatyny kórsetiledi. Kólik buzylǵan nemese operatormen baılanys úzilgen jaǵdaıda qaýipsiz toqtaıtyn oryn da aldyn ala belgilenedi.

Baǵytty belgileý kezinde joldyń jaı-kúıi, kólik qozǵalysynyń jıiligi, qıylystar men jaıaý júrginshiler ótkelderiniń ornalasýy eskeriledi. Sondaı-aq jol belgileri men baǵdarshamdardyń anyq kórinýi jáne operator men kólik arasyndaǵy baılanystyń úzilmeýi mańyzdy.

Júrgizýshisiz kólik belgilengen aýmaqtan shyǵa almaıdy. Eger baǵyty sol aýmaqtyń shekarasynan asyp ketse, ruqsat etilgen jerge toqtaýy kerek.

Kólikti qashyqtan operator basqarady

Júrgizýshisiz kóliktiń qozǵalysyn qashyqtan operator baqylap otyrady. Ol kóliktiń belgilengen baǵyttan aýytqymaýyn qadaǵalaıdy. Qaýip tónse nemese kólikte aqaý paıda bolsa, basqarýdy óz qolyna alyp, ony qaýipsiz toqtatýy kerek.

Baılanys úzilgen nemese júıe isten shyqqan jaǵdaıda kólik jyldamdyǵyn azaıtyp, apattyq shamdaryn qosady da, qaýipsiz jerge toqtaıdy. Aqaý joıylyp, jol júrýge qaýipsiz bolǵanda ǵana qozǵalysyn jalǵastyra alady.

Júrgizýshisiz kólik te joldaǵy ózge kólikter sııaqty baǵdarshamǵa, jol belgileri men tańbalaryna baǵynýy kerek. Qıylystan ótý, burylý, basyp ozý, toqtaý jáne turaqqa qoıý tártibin de saqtaýǵa mindetti. Arnaıy jaryq jáne dybys dabylyn qosqan jedel qyzmet kólikterine jol berýi tıis.

Polıtsııa nemese kóliktik baqylaý qyzmetkeri toqtaýdy talap etse, operator kólikti kórsetilgen jerge toqtatýy kerek. Naqty oryn kórsetilmese, qaýipsiz ári toqtaýǵa ruqsat etilgen jaqyn jerge toqtatady.

Jol-kólik oqıǵasy bolǵan jaǵdaıda kólik toqtap, apattyq shamdaryn qosady. Operator bul týraly ishki ister organdaryna dereý habarlap, oqıǵa ornyn naqty kórsetýi kerek. Zardap shekkender bolsa, jedel járdem shaqyrady. Polıtsııa qyzmetkerleriniń zańdy talaptaryn oryndaýǵa mindetti.

Aıta keteıik, jańa talaptar 2026 jylǵy 20 qarashadan bastap kúshine enedi.

Buǵan deıin Astana, Almaty jáne Qosshyda júrgizýshisiz júretin kólikter synaqtan ótetini týraly jazǵan edik.