Elimizde júrgizýshilerdi tekserý tsıfrlandyrylady
ASTANA. KAZINFORM — 25 tamyzdan bastap júrgizýshilerge qatysty birqatar ózgeris kúshine enedi. Endi 65 jastan asqan azamattar men múgedektigi bar júrgizýshiler eki jyl saıyn mindetti medıtsınalyq tekserýden ótedi. Sondaı-aq jol qozǵalysy erejesin birneshe ret óreskel buzǵandar teorııalyq emtıhandy qaıta tapsyrady. Ózgeristerdiń negizgi maqsaty — qoldanystaǵy talaptardy tsıfrlandyryp, jol qaýipsizdigin kúsheıtý.
Mamandardyń aıtýynsha, mindetti medıtsınalyq tekserý burynnan bar talap. Alaıda endi onyń oryndalýy tolyq avtomattandyrylady. Densaýlyq saqtaý jáne Іshki ister mınıstrlikteriniń aqparattyq júıeleri biriktirilip, júrgizýshiler týraly málimetter elektrondy túrde almasady. Sonyń arqasynda kólik júrgizýge medıtsınalyq qarsy kórsetilimi bar azamattardy anyqtaý jáne júrgizýshi kýáliginiń mártebesin baqylaý avtomatty túrde júzege asady.
— Norma 2014 jyldan beri jumys istep keledi. Buǵan deıin ІІM Densaýlyq saqtaý mınıstrligine suranys joldap, qarsy kórsetilimi bar azamattardyń tizimin alyp, ár qujatty jeke zerdeleıtin. Sodan keıin ǵana júrgizýshi kýáliginiń kúshi toqtatylatyn. Endi bul protsess eki vedomstvonyń aqparattyq júıeleri arqyly tolyq tsıfrlandyrylyp otyr, — dedi QR ІІM Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova Jibek Joly telearnasynyń «Búgin Live» baǵdarlamasynda.
Onyń sózinshe, jańa júıe júrgizýshiler úshin rásimdi kúrdelendirmeıdi. Azamattar burynǵydaı 073 medıtsınalyq anyqtamasyn alady, tek endi ony medıtsınalyq uıym elektrondy júıege ózi engizedi.
— Eshkim júrgizýshi quqyǵynan aıyrmaıdy. Tek ýaqytynda medıtsınalyq tekserýden ótý qajet. Eger azamat eskertý alǵanyna qaramastan tekserýden ótpeı kólik júrgizse, bul ákimshilik quqyq buzýshylyq bolyp esepteledi, — dedi maman.
Sonymen qatar ózgerister jol erejesin júıeli túrde buzatyn júrgizýshilerge de qatysty. Ákimshilik quqyq buzýshylyq týraly kodekstiń 153-babyna sáıkes, qaıtalanatyn nemese óreskel quqyq buzýshylyq jasaǵan azamattar teorııalyq emtıhandy qaıta tapsyrýǵa mindetteledi. Eger júrgizýshi eki aı ishinde emtıhan tapsyrmasa, onyń júrgizýshi kýáliginiń kúshi ýaqytsha toqtatylady.
— Avtokólikterge kedergi keltirgenderge nemese kóshe-jol qıylysynda apattyq jaǵdaı týǵyzǵan júrgizýshilerge teorııalyq emtıhan tapsyrý týraly habarlama jiberiledi. Al alkogoldik masań kúıde kólik júrgizip, adam ólimine ákelgen jaǵdaıda burynǵydaı sot sheshimimen segiz jylǵa deıin kólik júrgizý quqyǵynan aıyrylady. Eger mundaı quqyq buzýshylyqty júrgizýshi kýáligi joq adam jasasa, oǵan segiz jyl boıy júrgizýshi kýáligin alýǵa tyıym salynady, — dedi Aqtoty Boranova.
Buǵan deıin adam saýdasynyń qurbany bolǵan 15 adamǵa kómek kórsetilgenin jazǵan edik.
