Qazaqstanda júrgizýshi kýáligin alý erejesine ózgeris engizilýi múmkin
ASTANA. KAZINFORM – Іshki ister mınıstrligi Tsıfrlyq damý mınıstrligimen birlesip, júrgizýshi kýáligin alý úshin emtıhan qabyldaý qaǵıdalaryna ózgeris engizý máselesi pysyqtalyp jatqanyn habarlady.
Usynylyp otyrǵan túzetýler rásimderdiń ashyqtyǵyn arttyrýǵa jáne azamattar úshin qolaıly jaǵdaı jasaýǵa baǵyttalǵan. Atap aıtqanda, emtıhan tapsyrý áreketteriniń sanyna qoıylǵan shekteýdi alyp tastaý kózdelip otyr.
Sondaı-aq praktıkalyq emtıhandy merziminen buryn qaıta tapsyrý múmkindigi engiziledi — ár 10 kún saıyn aqyly negizde. Bul rette azamattar úshin tegin qaıta tapsyrý quqyǵy saqtalady — 30 kúnde bir ret.
Sonymen qatar tsıfrlandyrý máselelerine erekshe nazar aýdarylady. Emtıhan qabyldaý protsesin avtomattandyrý deńgeıin arttyrý jáne adam yqpalyn barynsha azaıtý boıynsha sheshimder pysyqtalyp jatyr.
ІІM-de mundaǵy basty mindet — kólik júrgizý daǵdylaryn obektıvti baǵalaýdy qamtamasyz etý, barshaǵa teń jaǵdaı jasaý jáne kez kelgen zań buzýshylyqqa jol bermeý ekenin atap ótti.
Aıta keteıik, QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıevtiń tóraǵalyǵymen júrgizýshi kýáligin alý úshin emtıhan tapsyrý rásimin jetildirý máseleleri boıynsha keńes ótti.
