Qazaqstanda júrgizýshi kýáligin avtomektepterden satyp alýdy doǵaratyn ýaqyt jetti - QR Júrgizýshiler odaǵynyń tóraǵasy
ASTANA. QazAqparat - Qazaqstanda júrgizýshi kýáligin avtomektepterden satyp alýdy doǵaratyn ýaqyt jetti. Bul týraly búgin QR Parlamenti Májilisinde ótken dóńgelek ústel barysynda QR Júrgizýshiler odaǵynyń tóraǵasy Talǵat Jańabaev aıtty.
Onyń sózine qaraǵanda, búgingi kúni kez kelgen azamat avtomektepterden júrgizýshi kýáligin belgili bir mólsherdegi aqshaǵa emin-erkin satyp alady.
«Avtomektepter is júzinde júrgizýshi kýáligin satýmen aınalysady. Ony tipti týǵan kúnge syılyq retinde tartý etýge de bolady. «Ulym 18-ge toldy. Biz oǵan mashına men júrgizýshi kýáligin syılaǵymyz keledi», - deıdi. Mundaı tájirıbe bar. Nege mundaı tájirıbemen kúrespeske?» - dedi ol.
Onyń paıymynsha, dál osy jaıttyń saldarynan, ıaǵnı júrgizýshilerdiń biliksizdiginen ári tájirıbesiniń joqtyǵynan jol apaty kóbeıip otyr.
«Biz erikti túrde synaq júrgizgen edik. 100 júrgizýshiniń tek 13-i ǵana jol qozǵalysy erejesinen óte aldy. Bul kólik basqaryp júrgen júrgizýshiler. Bul memlekettik problema», - dep atap ótti odaq basshysy.
T.Jańabaevtyń atap ótýinshe, Keńes odaǵy tusynda júrgizýshiniń jylyna 1-2 ret synaqtan ótýi týraly talap bolǵan. Qazirgi ýaqytta ol talap qoldanylmaıdy.
«Buǵan qosa, zańnama, jol qozǵalysy erejesi túbegeıli ózgeriske ushyrady. Júrgizýshiler bul erejelerdi qasaqana buzbaıdy. Óıtkeni, olar erejeni bilmeıdi», - dedi ol.
