Qazaqstanda júrgizilgen koronavırýsqa qarsy vaktsınatsııa: Mınıstrlik túsinikteme berdi
Qazaqstandaǵy koronavırýsqa qarsy alǵashqy vaktsınatsııa Qazaq ulttyq agrarlyq ýnıversıteti janyndaǵy Halyqaralyq vaktsınatsııa ortalyǵynda ótkizildi. Vaktsınatsııadan ótken alǵashqy qazaqstandyq - ortalyq dırektory Qaısar Tabynov. Oǵan Avstralııada jasalǵan COVAX-19 preparaty salyndy. Preparat qazirgi ýaqytta klınıkalyq zertteýlerdiń birinshi satysynda. QR Densaýlyq saqtaý mınıstrliginiń resmı ókili Baǵdat Qojahmetov tıisti erejeler bar ekenin, olarǵa sáıkes taýarlar men qyzmetterdiń sapasyn baqylaý komıteti osyndaı klınıkalyq synaqtardy ótkizýge ruqsat berýi kerektigi týraly aıtty.
«Bul ońaı isteletin jumys emes. Bizde Densaýlyq kodeksi, tıisti erejeler men reglamentter bar. Osy erejelerge sáıkes Taýarlar men qyzmetterdiń sapasy men qaýipsizdigin baqylaý komıteti osyndaı klınıkalyq synaqtarǵa ruqsat berýi kerek. Ol úshin arnaıy hattamalar men protsedýralar bar. Búgingi tańda Densaýlyq saqtaý mınıstrligine QazUAÝ janyndaǵy Halyqaralyq vaktsınatsııa ortalyǵynan mundaı ótinish túsken joq. Tıisinshe, saraptama qorytyndysyn alý úshin olar dári-dármekter men medıtsınalyq maqsattaǵy buıymdardy ulttyq saraptaý ortalyǵyna habarlasýy kerek. Sodan keıin olar munymen aınalysa alady», - deıdi Baǵdat Qojahmetov.
Onyń aıtýynsha, kez kelgen dári-dármekti jasaý biraz ýaqytty alady, óıtkeni bul uzaq jáne aýyr protsess.
«Men naqty aıtamyn: ýákiletti organ - QR Densaýlyq saqtaý mınıstrligi eshkimge mundaı ruqsat bergen joq, biz ótinish alǵan joqpyz. Kez kelgen dárilik preparattyń jasalýy birneshe kezeńnen turatyn uzaq jáne aýyr protsess. Nátıjesinde onyń qaýipsizdigi, tıimdiligi men sapasy rastalady. Bul óte kúrdeli másele», - deıdi ol.
Aıta ketsek, búgin birqatar qazaqstandyq BAQ-ta Qazaqstanda alǵash ret koronavırýsqa qarsy vaktsınatsııa júrgizilgeni týraly aqparat taraǵan bolatyn.