Qazaqstanda júrekke arnalǵan preparattyń biri keri qaıtaryldy

ASTANA. KAZINFORM — Germanııalyq kompanııa óndiretin «Izoptın» preparatynyń tirkeý kýáligi Qazaqstanda keri qaıtaryldy. 

Sheshimge QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetiniń tóraǵasy qol qoıdy. Buıryq qol qoıylǵan kúnnen bastap kúshine endi.

Preparatty keri qaıtarý «Abbott Qazaqstan» kompanııasy ókildiginiń ótinishi negizinde júzege asyryldy. 2026 jylǵy 9 aqpandaǵy № 89-NQ buıryqqa sáıkes, atalǵan dárilik zatty endi elimiz aýmaǵynda aınalymǵa jiberýge jáne qoldanýǵa bolmaıdy.

Medıtsınalyq jáne farmatsevtıkalyq baqylaý komıteti aýmaqtyq bólimshelerge bir jumys kúni ishinde jergilikti densaýlyq saqtaý organdaryn, tirkeý kýáliginiń ıesin jáne memlekettik saraptama uıymdaryn habardar etýdi tapsyrdy.

Aıta keteıik, Pavlodar oblys ortalyǵyndaǵy kópqabatty turǵyn úıdiń turǵyndary aýlada nashaqorlardyń tolyp ketkenine alańdap otyr. Aıtýlarynsha, buǵan sol jerde ornalasqan dárihananyń keıbir preparattardy zańsyz satýy sebep bolyp otyr.

Sonymen qatar, Densaýlyq saqtaý vıtse-mınıstri Tımýr Sultanǵazıev elordadaǵy tis emhanada 3 jasar sábıdiń mert bolýyna baılanysty «Sevoran» preparatyn qoldaný máselesi qaıta qarala ma degen saýalǵa jaýap berdi.

Oǵan qosa, damyǵan elderde tıimdiligin dáleldegen dárilik zattarǵa jeńildetilgen tirkeý rásimi engiziletini aıtyldy.