Qazaqstanda júrek-qan tamyrlary júıesiniń aýrýlarynan bolatyn ólim-jitim kórsetkishi tómendeýde

ASTANA. QazAqparat - Qazaqstanda sońǵy 7 jylda mıokardtyń jiti ınfarktinen bolatyn ólim-jitim 2009 jylǵy 3 myń 476 adamnan 2015 jyly 1 myń 876 adamǵa, ıaǵnı 1,8 esege azaıdy. 2016 jylǵy 10 aıdaǵy ólim-jitim kórsetkishi 100 myń adamǵa shaqqanda 12,18 boldy. Bul ótken jyldyń atalǵan ýaqytymen salystyrǵanda 12,1%-ǵa tómen (2015 jylǵy 10 aıda - 13,86) boldy, dep habarlaıdy QR Densaýlyq saqtaý jáne áleýmettik damý mınıstrliginen.

Júrek-qan tamyrlary aýrýlary álemdegi ólim-jitimniń negizgi sebebi bolyp otyr. Dúnıejúzilik densaýlyq saqtaý uıymynyń málimeti boıynsha, jyl saıyn ınfarkt pen ınsýlttan 17,1 mln. adam qaıtys bolady. Ol kóp jaǵdaıda jastardyń arasynda kezdesedi. Durys emes tamaqtaný, fızıkalyq ınerttilik, temeki men ishimdikti paıdalaný - aýrý týdyratyn qaýiptiń negizgi faktorlary bolyp tabylady.

Qazaqstanda júrek-qan tamyrlary júıesiniń aýrýlarynan bolatyn ólim-jitimdi azaıtý maqsatynda QR densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasyn júzege asyrý aıasynda  negizgi áleýmettik máni bar, juqpaly emes aýrýlar men eldiń demografııalyq ahýalyna aıtarlyqtaı áseri bar 5 aýrý, onyń ishinde mıokardtyń jiti ınfarkti boıynsha medıtsınalyq kómek kórsetýdiń  biriktirilgen úlgisi engizilýde.

Búgingi tańda árbir baǵyt boıynsha qyzmettiń barlyq túrleri kórsetilýde: profılaktıka, emdeý sharalary, onyń ishinde ońaltý, dıspanserlik baqylaý, medıtsınalyq jáne áleýmettik qyzmetter.

Medıtsınalyq kómek kórsetýdiń  biriktirilgen úlgisi engizý boıynsha Jol kartasyn júzege asyrý sharalarynyń aıasynda oblystyq, Astana jáne Almaty qalalyq densaýlyq saqtaý basqarmalarynyń, respýblıkalyq jáne aımaqtyq medıtsınalyq uıymdardyń jumysyn úılestirý maqsatynda 5 úılestirý keńesi quryldy.