Qazaqstanda júrdek poıyzdarǵa ıkemdi baǵa belgileý júıesi engiziledi

ASTANA. QazAqparat - «Jolaýshylar tasymaly» AQ baspasóz qyzmeti 2015 jyldyń 8 sáýirinen bastap №1/2 Astana-Almaty jáne №701/702 Almaty - Petropavl baǵyttary boıynsha 2015 jyldyń 22 mamyrynan bastap saparǵa shyǵatyn «Tulpar-Talgo» poıyzdaryna tarıfti basqarýdyń ıkemdi baǵdarlamasyn engizetinin habarlaıdy.

Bul baǵdarlama bıletti satyp alýdyń neǵurlym uzaq merzimi (satylymnyń tereńdigi) men oǵan degen suranysqa (poıyzdyń qanshalyqty tolýyna) qaraı ózgerip otyrady. Máselen, bıletti aldyn ala satyp alǵan jolaýshy bılettiń bazalyq baǵasynan 35 paıyzǵa deıin jeńildikke ıe bola alady.

Poıyzdyń júrý ýaqyty jaqyndaǵan saıyn bılet baǵasynyń óse túsetinin de aıta ketý kerek.

Sondaı-aq, tarıfti basqarýdyń ıkemdi baǵdarlamasy tómendegi «Tulpar-Talgo» poıyzdaryna da engizilgen: 19/20 Astana-Atyraý, 35/36 Almaty-Shymkent №49/50 «Almaty-Aqtóbe», №67/68 «Astana-Zaşıta («Óskemen»), №69/70 «Almaty-Zaşıta («Óskemen»), №77/78 «Almaty-Atyraý», №79/80 «Astana-Shymkent», №87/88 «Aqtóbe-Astana», №89/90 «Astana-Qyzylorda».

Múmkindikteri shekteýli adamdar men olardy ertip júrgen tulǵalarǵa atalmysh baǵdarlama júrmeıdi, mundaı arnaıy oryndarǵa bazalyq tarıftiń 50 paıyzy kóleminde jeńildikter qarastyrylǵan.

Budan bólek árbir sanattaǵy jolaýshylarǵa 10 paıyzdan 20 paıyzǵa deıin jeńildikteri bar kelesi dıskonttyq kartalar qarastyrylǵan:

«Qurmet» - 60 jas pen odan eresek adamdar úshin, jeńildik kólemi - 10%;

«Jastar» - 16-25 jas aralyǵyndaǵy jastar úshin, jeńildik kólemi - 10%;

«Saıahatshy» - júrdek poıyzdarda sońǵy 12 aıda tómendegideı baǵaǵa saparlaǵan turaqty jolaýshylar úshin:

* 100 000 teńgeden 150 000 teńgege deıin, jeńildik kólemi - 10 paıyz;

* 150 001 teńgeden 200 000 teńgege deıin, jeńildik quny - 15 paıyz;

* 200 001 teńgeden joǵary, jeńildik kólemi - 20 paıyz.