Qazaqstanda jumyssyzdar sany azaıyp keledi - Mádına Ábilqasymova
ASTANA. QazAqparat - Qazaqstandaǵy jumyssyzdar sany 4,9 paıyzdy quraıdy. Áıelder men jastar arasyndaǵy jumyssyzdyq deńgeıi - 5,4 jáne 4,2 paıyz. Bul týraly QR Eńbek jáne halyqty áleýmettik qorǵaý mınıstri Mádına Ábilqasymova vedomstvonyń keńeıtilgen alqa jıynynda málim etti, dep habarlaıdy QazAqparat.
«2017 jyldyń qorytyndysy boıynsha eńbek naryǵynyń kórsetkishteri tolyǵymen jaqsartyldy. Jumyssyzdardyń sany sońǵy 10 jyl ishinde 180 myńǵa azaıdy. Jumyssyzdyq deńgeıiniń turaqty túrde tómendep kele jatqany baıqalady. Búgingi tańda bul kórsetkish 4,9 paıyzdy quraıdy. Áıelder men jastar arasyndaǵy jumyssyzdyq deńgeıi 5,4 jáne 4,2 paıyzdy quraıdy. Bul kórsetkishter respýblıkamyzdyń táýelsizdigi kezeńindegi eń tómen deńgeı», - dedi Mádına Ábilqasymova Eńbek jáne halyqty áleýmettik qorǵaý mınıstrligi alqasynyń keńeıtilgen otyrysynda.
Mınıstrdiń aıtýynsha, búginde Qazaqstandaǵy jumys kúshi 8 mln 980 myń adamdy quraıdy. Jaldamaly jumyskerlerdiń sany 1,8 paıyzǵa ósse, ózin-ózin jumyspen qamtyǵan azamattardyń sany 4,5 paıyzǵa azaıǵan.
Sondaı-aq, Qazaqstandaǵy bir jumysshynyń ortasha aılyq jalaqysy 147 myń 988 teńgege deıin nemese 3,6 paıyzǵa ósken.
2017 jyldyń 11 aıyndaǵy baǵalaý boıynsha turǵyndardyń jan basyna shaqqandaǵy nomınaldyq tabysy 6 paıyzǵa ósip, 79 myń 727 teńgeni quraǵan.
Aıta keteıik, Astanada QR Eńbek jáne halyqty áleýmettik qorǵaý mınıstrliginiń keńeıtilgen alqa májilisi ótip jatyr. Onda 2017 jyly atqarylǵan jumys qorytyndylary jáne Elbasy Joldaýynda aıtylǵan tapsyrmalardy júzege asyrý taqyryby talqylanýda.
