Qazaqstanda jumyssyz júrgenderdiń úshten biri - joǵary bilimi bar adamdar
ASTANA. QazAqparat - Búginde eńbek naryǵyna qaraı maman daıarlaǵan mańyzdy. Osy oraıda qajetti mamandyqtarǵa bilim granttaryn der kezinde bólip otyrý qajet. Búginde osy jumyspen eki mınıstrlik aınalysady. QR Eńbek jáne xalyqty áleýmettik qorǵaý mınıstrligi naryqtyń suranysyn kórsetse, QR Bilim jáne ǵylym mınıstrligi soǵan qaraı granttardy taratyp otyrady, dep xabarlaıdy QazAqparat tilshisi.
QR Bilim jáne ǵylym vıtse-mınıstri Talǵat Eshenqulovtyń aıtýynsha, búginde QR Eńbek jáne xalyqty áleýmettik qorǵaý mınıstrligi mamandarǵa degen suranystyń boljamyn usynady. Biraq ol mamandardyń bilim deńgeıi, naqty mamandyǵy men klasıfıkatsııasyna qatysty málimetter joq.
«Sonyń saldarynan biz naqty mamandyqtar men olardyń bilim deńgeıi boıynsha suranysty kóre almaımyz. Budan bólek, memlekettik organdar, jergilikti atqarýshy organdar men ulttyq kompanııalar aǵymdaǵy suranysty usynady. Al ol mamanǵa tórt jyldan keıin suranys bola ma, joq pa, osy máseleni eskermeıdi. Osynyń saldarynan búginde joǵary oqý oryndarynyń túlekterine tolyqqandy suranys bolmaıdy. Sondyqtan eńbek naryǵyna qajetti mamandarǵa boljam jasaý tetikterin ózgertý kerek», - dedi T.Eshenqulov QR Parlament Májilisinde ótken dóńgelek ústelde.
Al depýtat Jámılıa Nurmambetovanyń sózine qaraǵanda, eki mınıstrlik ózine júktelgen jumysty oıdaǵydaı atqarsa, eńbek naryǵynda jumyssyzdyq máselesi bolmaıdy. Sebebi eńbek naryǵyna qaraı bilim granttary taratylǵannan keıin joǵary oqý oryndaryn bitirgen jastar birden jumysqa turýy tıis. Biraq búginde osy saladaǵy usynys pen suranys ártúrli bolyp tur.
«Máselen, aýyldyq kvotamen bilim alǵan jastardy alaıyqshy, úsh jyldyń ishinde atalǵan kvotamen 10 719 adam joǵary bilim alyp shyqty. Alaıda olardyń tek 25 paıyzy ǵana jumysqa turdy. QR Eńbek jáne xalyqty áleýmettik qorǵaý mınıstrliginiń málimetine sáıkes, elimizde 441 893 jumyssyz adam bar. Olardyń 30 paıyzy - joǵary bilimi bar azamattar. Al 2017 jylda jumys berýshilerde 26 myń bos jumys orny boldy. Sebebi úmitkerlerdiń bilimi sol vakansııalarǵa sáıkes kelmedi. Jumys bar, biraq adamnyń alǵan bilim kelmeıdi. Memlekettik tapsyrysty tıimdi úılestirmeýden osyndaı problemalar týyndaıdy», - dep atap kórsetti J.Nurmambetova.
Aıta keteıik, bıyl bilim granttaryn taǵaıyndaý júıesinde ózgerister bolady. Joǵary oqý oryndaryn jan basyna qaraı qarjylandyrý júıesine basymdyq beriledi. Máselen, UBT-da joǵary upaı alǵan mektep túlegi qaı oqý ornyn tańdasa, sol jerge grant beriledi. Budan bólek, mektep túlekterine mamandyqty tańdaý jaǵy jeńildeı túsedi. Sonymen qatar, jıynda «Serpin» baǵdarlamasynyń granttary ıgerilmeı jatqandyǵy aıtyldy.
