Qazaqstanda jumysshylardyń 20 paıyzy orta bilimdi
AQTÓBE. QazAqparat - Elimizde jumysshylardyń 20 paıyzy orta bilimmen eńbek etip júr.
Qazirgi kúni Qazaqstanda 445 myń jumyssyz bar bolsa, olardyń 32 paıyzy mektep bitirgen soń oqymaı qalǵan. Bul týraly Aqtóbege jumys saparymen kelgen Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.
Qazaqstanda bıyl «Ónimdi jumyspen qamtý jáne jappaı kásipkerlikti damytý» baǵdarlamasy arqyly jumyssyzdar men mektep bitirgen túlekterge tegin tehnıkalyq bilim beriledi. Aqtóbede daıyndyq bastaldy. Oqý oryndarynyń tizimi ázirlenip, qajetti mamandyqtar da anyqtaldy. Baǵdarlamaǵa sáıkes, stýdentterge ystyq tamaq beriledi, shákirtaqy tólenip, jatyn orynmen qamtamasyz etiledi. Al qysqa merzimdi kásibı bilim alatyn aýyl adamdary úshin Mobıldi oqý ortalyǵy qurylyp jatyr. Bul jumysty iske asyrý úshin 100 mıllıon teńge bólindi.
«Mobıldi oqý ortalyǵynyń jyljymaly bolýy mindetti emes. Bul jumyssyz bolsa da aýyldan shyǵa almaıtyn adamdar úshin tıimdi joba bolýy tıis. Sondyqtan aýyl ákimderimen birlese otyryp, shaǵyn kýrstardy uıymdastyrýǵa bolady. Qysqa merzimdi kýrstardyń 30 paıyzy teorııaǵa, 70 paıyzy óndiriske bólingeni durys. Máselen, shashtaraz mamandyǵyn oqytý úshin bilikti sheberdi shaqyryp, ol sol jerde bar tájirıbesimen bólisýi qajet. Oǵan mobıldi jyljymaly keshen kerek emes»,- dedi mınıstr Tamara Dúısenova.
Onyń aıtýynsha, Elbasy Joldaýyna saı úshinshi jańǵyrý tapsyrmasyn oryndaý úshin jumyssyzdar men eńbek etip júrgen adamdardyń biliktiligin arttyrý qajet. Sebebi, eńbek etip júrgen adamdardyń 20 paıyzy mektepten soń múlde bilim almaǵan. Al jumyssyzdardyń 32 paıyzy orta bilimmen shektelgen.
Aıta keteıik, bıyl Aqtóbede 16 myń jumys orny ashylady. «Ónimdi jumyspen qamtý jáne jappaı kásipkerlikti damytý» baǵdarlamasynyń «Bastaý Bıznes» jobasyna 122 mıllıon teńge bólindi. Al aýyldaǵy bıznesti sýbsıdııalaýǵa - 35, qala men aýyldaǵy shaǵyn nesıege kepildik berý baǵytyna 303 mıllıon teńge qarastyrylǵan. Áleýmettik jumyspen qamtý baǵytyna 152 mıllıon teńge bólindi. Jospar boıynsha barlyǵy 600-den astam adam eńbekke aralasýy tıis. Jastar tájirıbesine 848 adam qatystyrylyp, oǵan 346 mıllıon teńge bólinedi.
«Búgin Aqtóbedegi Halyqqa qyzmet kórsetý ortalyǵyna baryp, jumys oryndarymen tanystym. Elektrık mamandyǵyna suranys bar, biraq eńbek ótili úsh jyldan kem bolmaýy tıis eken. Jastar bul jumysqa ornalasa almaıdy. Sondyqtan jastar tájirıbesine tartyp, bir jyldyq eńbek ótilin jınaýǵa múmkindik beremiz»,- dedi T.Dúısenova.
