Qazaqstanda jumyspen qamtylǵandardyń sany sáýir aıynda 8,2 mln. adamdy qurady

Bul týraly QR Statıstıka agenttiginen habarlady.

Vedomstvonyń atap ótýinshe, ótken jylǵy sáıkes kezeńge qaraǵanda jumyspen qamtylǵandar sany 102,6 myń adamǵa nemese 1,3 paıyzǵa kóbeıdi. Jaldamaly qyzmetkerlerdiń sany atalǵan kezeńde 5,5 mln. adamdy (jumyspen qamtylǵandardyń jalpy sanynan 67,2%) qurady.

Aǵymdaǵy jylǵy sáýirde jumyssyzdar sany, baǵalaý boıynsha, 473,0 myń adamdy, jumyssyzdyq deńgeıi 5,5 paıyzdy qurady. Qazaqstan Respýblıkasy Eńbek jáne halyqty áleýmettik qorǵaý mınıstrliginiń jumyspen qamtý organdarynda 2011 jylǵy sáýir aıynyń sońyna 62,4 myń adam resmı tirkelgen. Tirkelgen jumyssyzdar úlesi ekonomıkalyq turǵydan belsendi halyqtyń 0,7 paıyzyna teń (2010 jylǵy sáýirde - 1,0%).

Aıta keteıik, jasyryn jumyssyzdyq (lajsyzdan tolyq emes jumyspen qamtylý) - qysqartylǵan jumys aptasy nemese tolyq emes jumys kúni rejıminde jumys isteıtin qyzmetkerlerdiń, sondaı-aq jalaqysy saqtalmaıtyn nemese eńbekaqysy jartylaı tólengen ákimshilik demalystarda bolǵan qyzmetkerlerdiń sanyn kórsetedi.

Jasyryn jumyssyzdyq deńgeıi - tolyq emes (jartylaı) jumyspen qamtylǵan jáne lajsyzdan demalysta bolǵan qyzmetkerlerdiń ekonomıkalyq turǵydan belsendi halyqtyń sanyndaǵy paıyzben ólshenetin úlesi.