Qazaqstanda jumyspen qamtýdyń jol kartasy aıasynda 154 myń jumys orny quryldy

NUR-SULTAN. QazAqparat - Jumyspen qamtýdyń 2020-2021 jyldarǵa arnalǵan jol kartasy aıasynda (budan ári – JQJK) 6 373 jobany iske asyrý bastalyp, olar boıynsha 154 myń jumys orny quryldy, dep habarlaıdy QazAqparat tilshisi.

QR Eńbek jáne halyqty áleýmettik qorǵaý mınıstrliginiń málimetine qaraǵanda, JQJK aıasynda jergilikti atqarýshy organdar iske asyrý úshin 6 762 jobany iriktep aldy.

JQJK ınfraqurylymdyq jobalaryn iske asyrý 4 negizgi baǵyt boıynsha ótedi:

– áleýmettik-mádenı nysandardy kúrdeli jáne aǵymdaǵy jóndeý, rekonstrýktsııalaý jáne salý (2 729 joba);

– turǵyn úı-kommýnaldyq sharýashylyq nysandaryn kúrdeli, ortasha jáne aǵymdaǵy jóndeý, rekonstrýktsııalaý (1 088 joba);

– ınjenerlik-kólik ınfraqurylymyn kúrdeli, ortasha jáne aǵymdaǵy jóndeý, rekonstrýktsııalaý jáne salý (1 926 joba);

– eldimekenderdi abattandyrý (1 019 joba).

JQJK ınfraqurylymdyq jobalaryn iske asyrý kezinde otandyq óndirýshilerdiń keminde 90% taýarlary men qyzmetin qoldanýdy qamtamasyz etý erekshe shart bolyp tabylady. Jumysshylardyń kem degende jartysy halyqty jumyspen qamtý ortalyqtary arqyly alynyp, basymdyq jumyssyz júrgen jastarǵa beriledi. Merdigerler sanıtarlyq-epıdemıologııalyq sharalardy qoldana otyryp, qaýipsiz eńbek jaǵdaıyn qamtamasyz etýge tıis.

4 tamyzdaǵy jaǵdaı boıynsha óńirlerde 6 373 joba boıynsha jumys bastaldy, 154 myń jumys orny quryldy, onyń ishinde halyqty jumyspen qamtý ortalyqtary arqyly 88 myń adam jumysqa ornalasty.

Buǵan deıin habarlanǵandaı, JQJK aıasynda barlyǵy 255 myń jumys ornyn ashý josparlanýda. Bul rette JQJK jobalary bolashaqta 100 myńnan astam turaqty jumys ornyn ashýǵa negiz bolady.