Qazaqstanda jumyskerdi jazataıym oqıǵadan mindetti saqtandyrý tólemi azaıdy
NUR-SULTAN. QazAqparat - 2020 jyldyń qańtar-tamyzynda jumyskerdi jazataıym oqıǵadan mindetti saqtandyrý segmentinde jınalǵan syıaqy kólemi 26,8 mlrd teńgeni qurady, dep habarlaıdy QazAqparat tilshisi ranking.kz portalyna silteme jasap.
2020 jyldyń qańtar-tamyzynda jumyskerdi jazataıym oqıǵadan mindetti saqtandyrý segmentinde jınalǵan syıaqy kólemi 26,8 mlrd teńgeni qurap, ótken jyldyń dál osyndaı kezeńimen salystyrǵanda 2,8 paıyzǵa ósti. Mindetti saqtandyrý boıynsha syıaqynyń jıyntyq kólemindegi segment úlesi 32 paıyzdan 33,4 paıyzǵa artty. Bul rette esepti kezeń ishinde sektordaǵy saqtandyrý tóleminiń kólemi 17 paıyzǵa, 3 mlrd teńgege qysqaryp otyr. Mindetti saqtandyrý boıynsha barlyq tólemderdegi úlesi 15,9 paıyzda 13,9 paıyzǵa deıin kemidi.
Jumyskerdi jazataıym oqıǵadan mindetti saqtandyrý segmentinde jınalǵan syıaqylardyń jartysyna jýyǵy ómirdi saqtandyrý jónindegi 2 kompanııaǵa ǵana tıesili: «NOMAD Life» (6,7 mlrd teńge, 1 jyl burynǵy kórsetkishten 16,8 paıyzǵa tómen) jáne «Halyk-Life» (6,3 mlrd teńge, 1 jylda mınýs 28,4 paıyz).
Syıaqy kóleminiń eń joǵary ósimin jyl ishinde 42,6 paıyz oń nátıje kórsetip, 4,3 mlrd teńgege jetkizgen «Eýrazııa» ómirdi saqtandyrý kompanııasy kórsetip otyr.
Aıta keterligi, 2019 jyly eńbek qyzmetimen baılanysty jazataıym oqıǵadan 1921 adam zardap shegip, 190 adam qaza tapty.
