Qazaqstanda jumysqa qansha sheteldik tartylǵany belgili boldy

NUR-SULTAN. QazAqparat - 2021 jylǵy 1 naýryzdaǵy jaǵdaı boıynsha 14 086 sheteldik azamat jergilikti atqarýshy organdardyń ruqsaty boıynsha Qazaqstan Respýblıkasynyń aýmaǵynda eńbek qyzmetin júzege asyryp jatyr, dep habarlaıdy QazAqparat.

«Sheteldik jumys kúshin (ShJK) tartýǵa berilgen ruqsattardyń ishinde mynadaı sanattar bar: birinshi sanat – 637 (basshylar jáne olardyń orynbasarlary), ekinshi sanat – 3 214 (qurylymdyq bólimshelerdiń basshylary). Tartylǵan ShJK-niń negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady, ıaǵnı tıisinshe 7 236 jáne 590 adam. Sondaı-aq maýsymdyq jumystarǵa – 689 adam, al korporatıvtik aýystyrý aıasynda 1 720 adam tartylǵan», - delingen Eńbek mınıstrligi málimetinde.

Qazirgi ýaqytta Qazaqstanda sheteldik jumys kúshin paıdalanatyn 1 762 jumys berýshi bar. Olarda shamamen 487 myń Qazaqstan azamaty jumys isteıdi, bul jalpy jumysshylar sanynyń 97 paıyzyn quraıdy.

Eńbekshi mıgranttar shyǵatyn negizgi elder kelesi: Qytaı – 3 613 adam, Túrkııa – 1 484 adam, Úndistan – 1 106 adam, Vengrııa – 1002 adam, Ózbekstan – 654 adam.

Esterińizge sala keteıik, ishki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn elimizge sheteldik mamandardy tartýǵa arnalǵan kvota belgileıdi. 2021 jyly kvota mólsheri jumys kúshine shaqqanda 0,31%-dy nemese 29,3 myńdy qurady.