Qazaqstanda jumys kúnin zańsyz uzartqanǵa aıyppul salynbaq

NUR-SULTAN. QazAqparat – Prokýrordyń qaýlysyn oryndamaǵany úshin jaýaptylyq belgilenedi. Bul týraly «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasyn talqylaý kezinde depýtat Gúlnar Bıjanova málim etti, dep habarlaıdy QazAqparat tilshisi.

«Eńbek zańnamasyna aǵymdaǵy jyldyń qańtarynda «jiberýshi» jáne «qabyldaýshy» taraptar degen jańa uǵymdar engizildi, olardyń quqyqtary men mindetteri bekitildi. Osyǵan baılanysty taraptar jumyskerlerdiń zańdy quqyqtary men múddelerin saqtamaǵany úshin ákimshilik jaýaptylyqty kózdeý usynylady. Jaýaptylyq qyzmet kórsetý shartyn jasasý kezinde de, onyń qoldanylý kezeńinde de taraptardy tártipke shaqyratyn bolady. Teń eńbek úshin teń eńbek jaǵdaılaryna konstıtýtsııalyq kepildikterdi qamtamasyz etedi. Sondaı-aq, jiberýshi taraptyń jumyskerleri úshin zańnamada kózdelgen jumys ýaqyty men kúndelikti jumystyń qalypty jáne qysqartylǵan uzaqtyǵyn zańsyz asyrǵany úshin qabyldaýshy taraptyń ákimshilik jaýaptylyǵyn belgileý usynylady», - dedi G. Bıjanova Májilistiń jalpy otyrysynda.

Budan bólek, Memleket basshysy qyrkúıek aıyndaǵy Joldaýynda kásipkerlerdiń quqyqtaryn qorǵaýdy kúsheıtýge erekshe nazar aýdardy. Mundaı baǵyt qadaǵalaý organyna qosymsha talaptar qoıady.

«Zań boıynsha, prokýrorǵa óz qaýlysymen barlyq zańsyz sheshimderdiń kúshin tez arada joıý, sondaı-aq memlekettik organdardyń negizsiz aktilerin toqtata turý quqyǵy berilgen. Alaıda, olardy oryndamaǵany úshin ákimshilik jaýaptylyq kózdelmegen. Bul azamattar men bıznestiń zańdy quqyqtary men múddelerin qorǵaý isinde prokýrordyń quqyq qorǵaý fýnktsııasyn tómendetedi. Osyǵan baılanysty biz prokýrordyń qaýlysyn oryndamaǵany úshin ákimshilik jaýaptylyq belgileýdi usynamyz», - dedi depýtat.