Qazaqstanda jumyspen qamtylǵandardyń eń kóbi saýda salasynda eńbek etedi
ASTANA. KAZINFORM — 2026 jylǵy I toqsannyń qorytyndysy boıynsha Qazaqstanda ekonomıkanyń birqatar negizgi salasynda jumyspen qamtylǵandar sany artty, dep habarlaıdy Ulttyq statıstıka bıýrosynyń baspasóz qyzmeti.
Ótken jyldyń sáıkes kezeńimen salystyrǵanda ónerkásipte, qurylysta, bilim berý salasynda, sondaı-aq densaýlyq saqtaý jáne halyqqa áleýmettik qyzmet kórsetý salasynda ósim baıqaldy.
Jumyspen qamtylǵandardyń eń kóp úlesi burynǵysynsha kóterme jáne bólshek saýda, sondaı-aq avtomobılder men mototsıklderdi jóndeý salasyna tıesili. Bul salada 1 571,4 myń adam jumys isteıdi, bul jumyspen qamtylǵan halyqtyń jalpy sanynyń 16,7% quraıdy.
Bilim berý salasynda 1 251,0 myń adam jumyspen qamtylǵan, bul ótken jyldyń sáıkes kezeńimen salystyrǵanda 0,5% artyq.
Ónerkásip salasynda jumyskerler sany 1 185,7 myń adamǵa jetip, 2,0% artty. Onyń ishinde taý-ken óndirý ónerkásibi jáne karerlerdi qazý salasynda 298,3 myń adam jumyspen qamtylǵan, bul 2025 jylǵy I toqsanmen salystyrǵanda 3,4% kóp.
— Jumyspen qamtylǵandar sany qurylys salasynda da ósip, 643,8 myń adamǵa jetti. Óńdeý ónerkásibinde 624,8 myń adam, al densaýlyq saqtaý jáne halyqqa áleýmettik qyzmet kórsetý salasynda 616,7 myń adam jumys isteıdi. Kólik jáne qoımalaý salasynda 663,2 myń adam jumyspen qamtylǵan, — delingen ulttyq bıýro usynǵan málimette.
Jalpy 2026 jylǵy I toqsannyń qorytyndysy boıynsha halyqty jumyspen qamtý qurylymy turaqty saqtalyp, ekonomıkanyń negizgi salalarynyń basym bóliginde jumyspen qamtylǵandar sanynyń oń dınamıkasy jalǵasyp keledi.
Budan buryn elimizde 200 myńnan astam azamat jumyspen qamtylǵanyn jazǵan edik.
