Qazaqstanda jumys izdeýshiler sany kúrt ósti
ASTANA. KAZINFORM — 2026 jylǵy maýsymda Enbek.kz Elektrondyq eńbek bırjasynda jumys berýshiler 108,7 myń bos jumys ornyn jarııalady, al jumys izdeýshiler 126,7 myń túıindeme ornalastyrdy. Mamyr aıymen salystyrǵanda bos jumys oryndarynyń sany 25,4%, al túıindemeler sany 38,3% artty.
Eńbek jáne halyqty áleýmettik qorǵaý mınıstrliginiń málimetinshe, platformadaǵy eńbek naryǵy mamyr merekelerine tán maýsymdyq báseńdeýden keıin qaıta jandandy. Jumys kúshiniń artýyna eńbek naryǵyna oqý oryndarynyń túlekteriniń shyǵýy da yqpal etti.
Salalyq qurylym boıynsha suranys kóshin bilim berý salasy (19,2 myń bos jumys orny) bastap tur. Sonymen qatar ózge de qyzmetter kórsetý salasynda (16,5 myń), aýyl, orman jáne balyq sharýashylyǵynda (12,1 myń), densaýlyq saqtaý jáne áleýmettik qyzmet kórsetý salasynda (9,5 myń), sondaı-aq qurylys (8,4 myń) jáne óńdeý ónerkásibi (7,3 myń) salalarynda da kadrlarǵa suranys joǵary deńgeıde saqtaldy.
Óńirlik bóliniste eń kóp bos jumys orny Túrkistan oblysynda (12,3 myń), Astana qalasynda (8,5 myń), Jambyl oblysynda (7 myń) jáne Qaraǵandy oblysynda (6,7 myń) jarııalandy.
— Biliktilik deńgeıi boıynsha suranys qurylymynda orta bilikti mamandar men biliktiligi tómen qyzmetkerlerge arnalǵan bos jumys oryndarynyń úlesi is júzinde teńesti — barlyq usynystyń shamamen 37-38%-y. Bul aýyl sharýashylyǵy men qurylys salalaryndaǵy jumysshy mamandyqtaryna maýsymdyq suranystyń artqanyn kórsetedi. Al joǵary bilikti mamandarǵa barlyq bos jumys oryndarynyń 25%-ynda suranys qalyptasty, — delingen habarlamada.
Jumys kúshiniń usynysy jaǵynan maýsym aıynda 126,7 myń túıindeme jarııalandy. Jumys izdeýshiler arasynda 35 jasqa deıingi jastardyń úlesi basym boldy. Bul — barlyq jarııalanǵan túıindemeniń 49%-y. Bul kórsetkishtiń artýyna eńbek naryǵyna oqý oryndarynyń túlekteriniń shyǵýy áser etti. Jumys izdeýshilerdiń ishinde 35–44 jas aralyǵyndaǵy azamattar — 25%, 45–54 jas aralyǵyndaǵylar — 17%, al 55 jastan asqandar 9% boldy. Genderlik qurylym boıynsha jumys izdeýshilerdiń 55%-y áıelder, 45%-y erler.
Biliktilik deńgeıi boıynsha jumys kúshiniń usynys qurylymy da eńbek naryǵyndaǵy suranysqa sáıkes keledi: túıindemelerdiń 37%-y orta bilikti mamandarǵa, 33%-y joǵary bilikti mamandarǵa, al 30%-y biliktiligi tómen jumys izdeýshilerge tıesili.
Maýsym aıynda eń joǵary jalaqy usynylǵan bos jumys oryndarynyń qatarynda dıvızıon dırektory (≈1,98 mln teńge), basqarma bastyǵynyń orynbasary (≈1,38 mln teńge) jáne uńǵyma ınjeneri (≈1,31 mln teńge) laýazymdary boldy.
Al jumys izdeýshiler arasynda eń joǵary jalaqy kútimi ushqysh (≈3,4 mln teńge), júıelik sáýletshi (≈2,5 mln teńge) jáne dáriger-hırýrg (≈2 mln teńge) mamandyqtary boıynsha tirkeldi.
— Jalpy, maýsym aıynyń qorytyndysy Enbek.kz platformasynda mamyr aıyndaǵy maýsymdyq báseńdeýden keıin eńbek naryǵyndaǵy belsendiliktiń qaıta jandanǵanyn kórsetti. Suranys pen usynys kólemi jyl basynan bergi eń joǵary deńgeıge jetti. Jumys berýshilerdiń kadrlarǵa degen negizgi suranysy negizinen áleýmettik salada, qyzmet kórsetý sektorynda jáne maýsymdyq salalarda saqtalyp otyr. Al jumys kúshiniń usynysy jaǵynan jastardyń, ásirese oqý oryndarynyń bıylǵy túlekteriniń eńbek naryǵyna belsendi shyǵýy baıqalady, — dep habarlady vedomstvo.
Jyl basynan beri platformada 604,4 myń bos jumys orny jáne 736 myń túıindeme jarııalandy.
Eske salaıyq, buǵan deıin Enbek.kz portalynda jańa servıs — Tsıfrlyq jumyspen qamtý qyzmeti iske qosylǵanyn habarlaǵanbyz.
