Qazaqstanda jumys isteıtinder sany 9,3 mln adamǵa jetti
ASTANA. KAZINFORM — Elimizde halyqtyń ekonomıkalyq belsendiligi artyp keledi. Qazirgi tańda eldegi jumys kúshiniń sany 9 mln 838,1 myń adamǵa jetti. Bul ótken jylmen salystyrǵanda 103 myńnan astam adamǵa kóp. Al jumyspen qamtylǵandardyń sany 9 mln 392 myń adamdy qurady. Bul týraly Eńbek jáne halyqty áleýmettik qorǵaý mınıstrligi málim etti.
Bul eńbek naryǵynda jańa jumys oryndary ashylyp, azamattardyń jumysqa ornalasý múmkindikteri artyp kele jatqanyn kórsetedi.
Eńbek naryǵyndaǵy turaqtylyqtyń mańyzdy kórsetkishteriniń biri — resmı túrde jumys isteıtin azamattar sanynyń ósýi. Bir jyl ishinde jaldamaly jumyskerlerdiń sany shamamen 150 myń adamǵa artyp, 7 mln 290,4 myń adamǵa jetti.
Sonymen qatar óz betinshe jumys isteıtin jáne turaqsyz jumyspen qamtylǵan azamattardyń sany azaıyp keledi. Bul azamattardyń eńbek sharty jasalyp, áleýmettik kepildikteri tolyq qarastyrylǵan resmı jumysqa birtindep aýysyp jatqanyn kórsetedi.
— Jumyspen qamtýǵa baǵyttalǵan memlekettik sharalar da óz nátıjesin berip otyr. 1 tamyzdaǵy jaǵdaı boıynsha memleket pen jumys berýshilerdiń qoldaýymen 388 512 adam jumysqa ornalastyryldy. Onyń ishinde 298 904 adam turaqty jumysqa turdy, — delingen habarlamada.
Bul kórsetkishter memleket úshin ýaqytsha jumyspen qamtýdan góri, azamattardyń turaqty ári sapaly jumysqa ornalasýyna jaǵdaı jasaý mańyzdy ekenin kórsetedi. Turaqty jumys adamnyń tabysyn qamtamasyz etip qana qoımaı, onyń áleýmettik kepildikterge ıe bolýyna múmkindik beredi.
Azamattardy jumyspen qamtýda Elektrondyq eńbek bırjasynyń, kásibı oqytý baǵdarlamalarynyń, sýbsıdııalanatyn jumys oryndarynyń jáne jumys berýshilermen júrgizilip jatqan jumystyń mańyzy zor. Bul tetikter jumys izdep júrgen azamattar men maman qajet etetin jumys berýshilerdi jyldam baılanystyrýǵa múmkindik beredi.
Vedomstvonyń málimetinshe, elektrondyq eńbek bırjasy arqyly azamattar bos jumys oryndaryn qarap, ózine sáıkes jumysty tańdaı alady. Al kásibı oqytý baǵdarlamalary jańa mamandyq meńgerýge nemese biliktilikti arttyrýǵa múmkindik beredi. Bul ásirese eńbek naryǵynda suranysqa ıe mamandyqtarǵa qaıta oqyp, jumysqa ornalasqysy keletin azamattar úshin mańyzdy.
Qazaqstan Respýblıkasy Eńbek jáne halyqty áleýmettik qorǵaý mınıstrligi aldaǵy ýaqytta da eńbek naryǵynyń turaqtylyǵyn saqtaý, jumyspen qamtýdyń jańa múmkindikterin damytý, azamattardyń biliktiligin arttyrý jáne eńbek ónimdiligin kóterýge qajetti jaǵdaı jasaý jumystary jalǵasatynyn atap ótti.
Jumyssyzdyq deńgeıiniń tómen bolýy jáne resmı jumyspen qamtylǵandar sanynyń ósýi Qazaqstandaǵy eńbek naryǵynyń birtindep nyǵaıyp kele jatqanyn kórsetedi. Bul óz kezeginde halyq tabysynyń ósýine jáne el ekonomıkasynyń turaqty damýyna múmkindik beredi.
Aıta keteıik, buǵan deıin Qazaqstanda jumyspen qamtý salasy jańa formatqa kóship jatqanyn jazdyq. Endi azamattar bos jumys oryndaryn ózderi izdemeı, júıe olardyń biliktiligi men eńbek naryǵyndaǵy suranysqa sáıkes jumys usynady.
