Qazaqstanda «jumys isteıtin kedeıler» fenomeni beleń aldy – depýtat

ASTANA. KAZINFORM – Qazaqstanda tolyq jumys kúni eńbek etse de, jalaqysy kedeılik sheginen asa almaıtyndar bar. Bul týraly Májilis depýtaty Ashat Aımaǵambetov aıtty.

«Áleýmettanýshylardyń aıtýynsha, Qazaqstanda «jumys isteıtin kedeıler» fenomeni beleń alyp jatyr. Ol degenimiz – tolyq jumys kúni eńbek etse de, jalaqysy kedeılik sheginen asa almaıtyn adamdar. Ásirese, bul memlekettik sektorǵa qatysty – kitaphanashylar, býhgalterler, tehnıkalyq qyzmetkerler jáne taǵy basqalary tolyq jumys kúni istep, alatyn jalaqysy boıynsha kedeılik sheginde tur. Bul da óte qaýipti jaǵdaı bolyp tur», - dedi A. Aımaǵambetov Májiliste «Qazaqstannyń eńbek naryǵyn damytý jáne kadrlyq áleýetin nyǵaıtý» atty Úkimet saǵatynda.

Depýtattyń aıtýynsha, buǵan deıin eńbek naryǵyna jyl saıyn 200 myń adam keletin. Al qazirgi ýaqytta bul kórsetkish 250 myńǵa jetip qaldy.

«Bes jyldan keıin bul tsıfrlar 350 myńǵa deıin barady degen boljam bar. Osylaısha 2030 jylǵa qaraı eńbek naryǵyna úlken qysym jasalady. Ol nege baılanysty? Árıne, birinshiden, bul demografııa, ıaǵnı baby boomer-lerdiń áseri. Ekinshiden, ómir súrý uzaqtyǵynyń artýy. Oǵan qosa, 2031 jylǵa qaraı áıelderdiń zeınetke shyǵý jasy 63 jasqa uzarýyna baılanysty eńbek naryǵynda 50 myńǵa jýyq adamnyń qalýy jáne avtomatızatsııanyń qarqyndy damýy da bar. Bul faktordyń barlyǵy eńbek naryǵyna aıtaryqtaı áser etip, jańa jumys oryndaryn qajet etedi. Al Qazaqstandaǵy eńbek naryǵynyń syıymdylyǵy óte shekteýli», - dedi A. Aımaǵambetov.

Buǵan deıin Májilis depýtaty eldegi jumyspen qamtý sharalarynyń tıimdi bolmaǵanyn synaǵan edi.