Qazaqstanda julyn maıynyń donorlary óte az - Donorlar tizbesiniń jetekshisi
ASTANA. QazAqparat - Oknologııalyq jáne onkogematologııalyq syrqaty bar, ıaǵnı, qannyń qaterli isigine shaldyqqan naýqastardyń ómirin julyn maıyn aýystyrý arqyly uzartýǵa bolatyny belgili.
Alaıda, ókinishke oraı, Qazaqstan Respýblıkasynda julyn maıynyń donorlary óte az. Bul týraly arnaıy baspasóz máslıhaty barysynda julyn maıy donorlary jáne transplantatsııany damytý jónindegi Ulttyq tizbeniń jetekshisi Dýlat Imashbaev málim etti.
«Jyl saıyn Qazaqstanda qannyń qaterli isigine shaldyqqan 300-ge jýyq naýqas gemopoetıkalyq kletkalardyń transplantatsııasyna muqtaj. Olardyń teń jartysy balalar men jasóspirimder. Alaıda, Qazaqstan Respýblıkasynda julyn maıynyń donorlary óte az. Elimizde tek 5000-ǵa jýyq adam ǵana qannyń qaterli isigine shaldyqqan adamdardy qutqarý úshin ózderiniń kletkalaryn donorlyqqa tegin usynady»,-deıdi Ulttyq tizbeniń jetekshisi.
D.Imashbaev julyn maıy onkologııalyq syrqaty bar adamdardyń, ásirese, bar ómiri áli aldaǵy sábıler men balalardyń ómirin uzartady, tym bolmaǵanda, dertin tejeıdi degen pikirin aıtty.
«Julyn maıyn aýystyrǵan soń sozylmaly leıkozben aýyratyn balalardyń 63 paıyzynyń, sozylmaly mıelomonotsıtti leıkozǵa shaldyqqan balalardyń 39 paıyzynyń ómiri bes jylǵa sozylady. Al, burynǵy ádis, ıaǵnı, hımııaterapııa arqyly emdegen kezde naýqastardyń tek 18 paıyzynyń ǵana beti beri qaraıdy»,-dep túsindirdi maman.
Donorlardyń azdyǵy qolbaılaý bolyp otyrǵan soń, julyn maıy donorlary jáne transplantatsııany damytý jónindegi Ulttyq tizbe ortalyǵynyń mamandary halyqaralyq uıymdarmen yntymaqtastyq ornata bastaǵan.
«Bıyl bizdiń ortalyq Pavlov atyndaǵy Sankt-Peterbor memlekettik medıtsına ýnıversıtetimen yntymaqtastyq týraly memorandýmǵa qol qoıýǵa ázirlenip jatyr. Sondaı-aq, Germanııadaǵa ataqty Stefan Morshtyń «izdeý tizbesiniń» akkredıtatsııalyq jelisi arqyly basqa da halyqaralyq donorlar tizbesimen iskerlik baılanystar ornatýdy kózdep otyrmyz»,-deıdi D.Imashbaev.
Kúnimjan Janat
