Qazaqstanda julyn bulshyqet atrofııasymen 128 bala aýyrady

NUR-SULTAN. QazAqparat - «Qazaqstan halqyna» qorynyń qarjylandyrýymen quny óte qymbat onasemogen abeparvovek preparaty satyp alyndy, dep habarlaıdy QazAqparat tilshisi «University Medical Center» korporatıvtik qoryna silteme jasap.

Bul dári sırek kezdesetin (orfandyq) aýrýlarǵa jatatyn julynnyń bulshyqet atrofııasy dıagnozy qoıylǵan balalarǵa arnalǵan.

«Densaýlyq saqtaý mınıstrligi onasemogen abeparvovek preparatyn engizýdiń klınıkalyq bazasy retinde «UMC« KQ Ana men bala ulttyq ǵylymı ortalyǵyn anyqtady. Búginde ortalyqta preparat 3 balaǵa qoldanyldy. Tórtinshi balaǵa 2022 jyldyń 7-sáýirine josparlanyp otyr. Dárigerler naýqastardyń jaǵdaıyn qanaǵattanarlyq dep baǵalaıdy», - delingen vedomstvonyń habarlamasynda.

Densaýlyq saqtaý mınıstrliginiń shtattan tys bas nevrology, professor Altynshash Jaqsybaevanyń aıtýynsha, julynnyń bulshyqet atrofııasy - julynnyń motorly neırondaryna áser etetin jáne bulshyqettiń álsizdigine ákep soǵatyn genetıkalyq aýrý.

«Ol - tuqym qýalaıtyn aýrýlardan bolatyn balalar óliminiń jıi kezdesetin sebepteriniń biri. Uzaq ýaqyt boıy emdelmeıtin dert bolyp sanaldy. Alaıda, 2016 jyldyń jeltoqsanynda alǵashqy preparaty farmatsevtıkalyq naryqqa shyqty. Sol jyly AQSh-ta, 2017 jyly Eýropalyq Odaqta jáne 2019 jyly Reseıde qoldanýǵa ruqsat etildi», - deıdi maman.

Qazaqstanda qazirgi ýaqytta mundaı dıagnoz 128 balaǵa qoıylǵan. Bolashaqta olardyń sany 250-ge deıin jetýi múmkin. Tıisinshe, mamandar memlekettik jáne qoǵamdyq uıymdardyń barlyq múmkindikterin paıdalanyp, kómekke muqtaj jandardy emdeýge áreket etýdiń mańyzdylyǵyn aıtýda.