Qazaqstanda júkti áıelderdiń 27 paıyzy anemııamen aýyrady

NUR-SULTAN. QazAqparat - Qazaqstandaǵy júkti áıelderdiń tórtten birinen astamy temir tapshylyǵynan zardap shegedi, dep habarlaıdy QazAqparat.

Aǵzadaǵy temir tapshylyǵy nemese temir tapshylyǵy anemııasy (TTA) – aǵzadaǵy temir deńgeıiniń tómendeýimen sıpattalatyn, qandaǵy erıtrotsıtter men gemoglobın kontsentratsııasynyń tómendeýine ákeletin patologııalyq jaǵdaı.

Dúnıejúzilik densaýlyq saqtaý uıymynyń málimeti boıynsha álemde 2 mıllıardtan astam adam temir tapshylyǵynan zardap shegedi.

Eń jıi kezdesetin sebepter - teńgerimsiz tamaqtaný, temirdi sińirý qabiletiniń tómendeýi jáne turaqty qan joǵaltý.

Negizgi táýekel tobynda vegetarıanshylar, qatań dıetadaǵy adamdar, sondaı-aq qart kisiler tur. Olarda ishektiń temirdi sińirý qabileti tómen keledi.

Temir tapshylyǵy anemııasy dıagnozy kóbinese balalarǵa, jasóspirimderge jáne júkti áıelderge qoıylady, óıtkeni olardyń kúndelikti temirge degen qajettiligi jalpy halyqqa qaraǵanda joǵary.

Qazaqstanda júkti áıelderdiń 27 %-da temir tapshylyǵy baıqalady.

Bul málimetterdi Densaýlyq saqtaý mınıstrligi 2020 jyl boıynsha jarııalaǵan.

Aıta ketý kerek, aýytqýlarǵa qaramastan, ortasha alǵanda bul úles ýaqyt óte kele tómendeıdi.

Mysaly, 2007-2011 jyldar aralyǵynda anemııa dıagnozy qoıylǵan júkti áıelderdiń úlesi 37,8-den 41,7%-ǵa deıin boldy.