Qazaqstanda júkti áıelderge 12 túrli medıtsınalyq tekserý tegin júrgiziledi
ASTANA. KAZINFORM – Qazaqstanda 1 mıllıonnan astam áıel áıelder konsýltatsııalarynyń qyzmetin aldy, dep habarlaıdy Densaýlyq saqtaý mınıstrligi.
Elimizde áıelderge medıtsınalyq kómektiń tutas kesheni memleket esebinen kórsetiledi. Bul qyzmetter reprodýktıvtik densaýlyqtyń barlyq mańyzdy kezeńin – otbasyn josparlaýdan bastap bosanǵannan keıingi qalpyna kelýge deıingi aralyqty qamtıdy.
425 medıtsınalyq-sanıtarııalyq alǵashqy kómek uıymy men 24 oblystyq perınataldyq ortalyqtyń bazasynda áıelder konsýltatsııalary ashylǵan. Olarda jeke tirkeý bólimderi, emshara kabınetteri jáne otbasyn josparlaý ortalyqtary uıymdastyrylǵan.
– 1 mıllıonnan astam áıel áıelder konsýltatsııalarynyń qyzmetterin aldy. Al júktiliktiń 10 aptasyna deıin esepke turǵan júkti áıelderdiń úlesi 18%-ǵa artyp, 71%-dy qurady, – delingen mınıstrlik málimetinde.
Uryqtyń týa bitken damý kemistikterin erte anyqtaý úshin barlyq óńirdegi perınataldyq ortalyqtar bazasynda «Bir kúndik klınıkalar» uıymdastyryldy. Munda júkti áıelder kepildik berilgen medıtsınalyq kómek sheńberinde 5 túrli zertteýden ótip, nátıjesin kelesi kúni alady.
2026 jyly dıagnostıkalyq zertteýlermen 100 myńnan astam júkti áıel qamtylyp, 500 myńnan astam qyzmet kórsetilgen. Nátıjesinde uryq kemistikterin anyqtaý kórsetkishi 13%-ǵa artsa, náreste óliminiń kórsetkishi 15%-ǵa tómendedi.
2025 jyldan bastap Qazaqstanda áıelderdi salaýatty júktilikke daıyndaýǵa baǵyttalǵan «Analar saýlyǵy» baǵdarlamasy iske asyrylyp keledi. Baǵdarlama aıasynda áıelderge 12 túrli medıtsınalyq tekserýden tegin ótý múmkindigi qarastyrylǵan.
Jyl saıyn respýblıkada 300 myńnan astam bosaný qabyldanady. Memleket ana men bala densaýlyǵyn saqtaýǵa jáne árbir áıelge turǵylyqty jerine nemese qarjylyq múmkindigine qaramastan medıtsınalyq kómektiń qoljetimdiligin qamtamasyz etýge baǵyttalǵan jumystardy jalǵastyryp keledi.
Aıta keteıik, endi júktilik pen bosanýǵa baılanysty tólemdi mobıldi qosymsha arqyly rásimdeýge bolady.
