Qazaqstanda júkti áıelderdiń 90% prenataldyq skrınıngpen qamtylǵan

ASTANA. KAZINFORM — Astanada Densaýlyq saqtaý mınıstrligi PІB Medıtsınalyq ortalyǵymen birlesip uıymdastyrǵan «Deni saý urpaq — ult bolashaǵy» prenataldyq medıtsına mamandarynyń II Halyqaralyq kongresi ótti, dep habarlaıdy DSM baspasóz qyzmeti.

Kongrestiń jumysy úsh beıindi sektsııa formatynda ótti: «Medıtsınalyq genetıka: skrınıngten dál dıagnostıkaǵa deıin», «Prenataldyq ýltradybystyq dıagnostıka. Prenataldyq medıtsınanyń qazirgi aspektileri» jáne «Balalardyń densaýlyǵyn saqtaýdaǵy mýltıdıstsıplınalyq tásil». Sektsııalyq otyrystar medıtsınalyq genetıkadan bastap neonataldyq hırýrgııaǵa deıingi ártúrli baǵyttaǵy mamandardy jınady.

QR Parlamentiniń senatory Nurtóre Júsip qatysýshylarǵa quttyqtaý sóz sóılep, eldiń bolashaǵy jas urpaqtyń densaýlyǵyna tikeleı baılanysty ekenin atap ótti.

Kongreske Reseı, Ýkraına, Chehııa, Ispanııa, AQSh jáne Bolgarııadan kelgen halyqaralyq sarapshylar qatysty. Olardyń qatarynda Roza Bataeva, Pavel Galda, Marııa del Mar Hıl, Elena Sınkovskaıa, Petıa Chaveeva jáne basqalar bar.

Qonaqtar qazaqstandyq mamandardy daıarlaýdyń joǵary deńgeıin jáne prenataldyq dıagnostıka men terapııadaǵy ozyq tásilderge qyzyǵýshylyqtyń artyp kele jatqanyn atap ótti.

Spıkerler týa bitken kemistikterdi erte anyqtaý, uryqtyń damý aýytqýlaryn dıagnostıkalaýdyń zamanaýı ádisteri, sondaı-aq Qazaqstandaǵy uryq jáne neonataldyq hırýrgııanyń jetistikteri týraly baıandamalar jasap, tájirıbelerimen bólisti, biregeı klınıkalyq jaǵdaılardy taldady.

Jumys qorytyndysy boıynsha qarar qabyldandy, onda eldegi prenataldyq medıtsınany odan ári damytý baǵyttary, sondaı-aq kásibı qoǵamdastyqty nyǵaıtý jáne ınnovatsııalyq tehnologııalardy praktıkaǵa engizý jónindegi is-sharalar kórsetilgen.

— Genetıkalyq aýrýlar men týa bitken kemistikterdi erte anyqtaý úshin «Bir kúndik klınıkalar» 15 perınataldyq ortalyq bazasynda ashyldy, 70 myńnan astam júkti áıel zerttep-qaraýdan ótti. Júkti áıelderdi prenataldyq skrınıngpen qamtý 2024 jyly 90%-ǵa jetti. Bir kúndik klınıka jobasyn engizý nátıjesinde uryqtyń TDK anyqtalýy 13%-ǵa ósti, ómirmen úılesimsiz TDK bar balalardyń týýy 7%-ǵa tómendedi, — delingen vedomstvo taratqan aqparatta.

Osydan buryn elimizde náreste men ana ólimi azaıǵany habarlandy.