Qazaqstanda júk tasymaly 2 jyl qatarynan 4 mlrd tonnadan asty
NUR-SULTAN. QazAqparat – Qazaqstanda júk tasymaly 2 jyl qatarynan 4 mlrd tonnadan asyp jyǵyldy. Barlyq júkterdiń 84 paıyzy avtokólikpen tasymaldansa, barlyq kiristiń 58 paıyzy qubyr jelisimen jetkizýden túsip otyr, dep habarlaıdy QazAqparat ranking.kz-ke silteme jasap.
2019 jyly kóliktiń barlyq túrimen júkterdi tasymaldaý kólemi 4,2 mlrd tonnany qurady. Bul 2018 jylǵy kórsetkishten 3,3 paıyzǵa artyq. Aıta keterligi, kórsetkish úshinshi jyl qatarynan ósim kórsetip otyr.
Qazaqstannyń óńirleri arasynda eń kóp júk tasymaly 864 mln tonna kóleminde Qaraǵandy oblysynda tirkelgen. Atalǵan kórsetkish 2018 jyldan 4,6 paıyzǵa kóp. Munan keıingi oryndaǵy Shyǵys Qazaqstan oblysynda bir jyl ishinde júk tasymaly 5,4 paıyzǵa artyp, 662,2 mln tonnaǵa jetti. Al jyldyq 7,8 paıyz ósimmen 320,1 mln tonna júk tasymaldanǵan Qostanaı oblysy úshinshi orynda tur.
Ótken jyldyń qańtar-jeltoqsanynda tasymaldanǵan júkterddiń basym bóligi, naqty aıtqanda 3,6 mlrd tonnasy júk avtomobılderimen tasymaldanǵan. Bul 2018 jyldyń 12 aıymen salystyrǵanda 3,7 paıyzǵa kóp.
Temir jol kóligimen 1 jyldyń ishinde 408 mln tonna nemese jalpy júk tasymalynyń 9,6 paıyzy jetkizilip, 12 aıda 2,5 paıyzǵa ósim kórsetti.
Al qalǵan kólik túrleri 279,6 mln tonna nemese jalpy júkterdiń 6,6 paıyzyn ǵana tasymaldaǵan. Bul rette 2018 jylǵy kórsetkish 283,7 mln tonna bolǵan edi. Al onyń 280,8 mln tonnasy qubyr jelisi arqyly tasymaldanǵan.
Kólik kásiporyndarynyń júk tasymalynan alǵan kiristeri 1 jyldyń ishinde 8,2 paıyzǵa artyp, 2,5 trln teńgege jetti. Bul kólik kiristeriniń jalpy kóleminiń 80,58 paıyzyn quraıdy. Onyń ishinde 1,4 trln teńge qubyr jelisimen tasymaldaýdan túsken kiris. Júk tasymalynan túsken jalpy kiristiń 57,9 paıyzy osy qubyr jelisine tıesili bolyp tur.
