Qazaqstanda júk tasymaldaý talaptaryn buzǵan sheteldikter anyqtaldy
ASTANA. QazAqparat - 2018 jyly Qazaqstan Respýblıkasynyń kólik zańnamasy buzǵan úshin 5 myńnan astam sheteldik tasymaldaýshy ákimshilik jaýapkershilikke tartyldy. Bul týraly QR Indýstrııa jáne ınfraqurylymdyq damý mınıstrliginen málim boldy, dep habarlaıdy QazAqparat.
Aıta keteıik, QR IIDM Kólik komıteti sheteldik tasymaldaýshylardyń arnaıy ruqsat qaǵazdarynsyz júk tasymaldaýlaryna jol bermeý maqsatynda 2018 jylǵy 19 qarashadan 2019 jyldyń 31 qańtar aralyǵynda ótken «Kóliktik baqylaý - otandyq tasymaldaýshylardyń múddesin qorǵaýda» aktsııasyn qorytyndylady.
«Ruqsat qaǵazdary sheteldik tasymaldaýshylarǵa Halyqaralyq kelisimderge sáıkes tapsyrylady. Ár memleket seriktes memleketke óz aýmaǵynda júk tasymaldaýǵa belgilengen mólsherde kvota beredi. Osy oraıda júk tasymaldaıtyn kompanııalardyń kvotasy bolmasa nemese merzimi ótse, shet memlekettiń terrıtorııasynda júk tasymaldaı almaıdy. Aktsııa aıasynda kóliktik baqylaý organdarymen 14 823 sheteldik avtokólik tekserilip, 733 tasymaldaýshy Qazaqstan Respýblıkasynyń kólik zańnamasy men halyqaralyq kelisim normalaryn buzǵany úshin ákimshilik jaýapkershilikke tartyldy. Onyń ishinde 196-sy ruqsat júıesi boıynsha. Atap aıtqanda, 7 -reseılik, 3- túrkııalyq , 3-ózbekstandyq , 2 - qyrǵyzstandyq jáne basqa da taǵy 5 tasymaldaýshy qajetti qujattarsyz Qazaqstan aýmaǵynda júk tasymaldaýmen aınalysqan», - delingen vedomstvo málimetinde.
Jalpy, 2018 jyly halyqaralyq kelisim normalaryn jáne Qazaqstan Respýblıkasynyń kólik zańnamasy buzǵan úshin 5 227 sheteldik tasymaldaýshy ákimshilik jaýapkershilikke tartylǵan. Barlyq quqyq buzýshylyq arasynda 1 323 tasymaldaýshy Halyqaralyq kelisim normalaryn buzǵandary úshin jaýapqa tartylǵan.
