Qazaqstanda júk tasymaldaýdy jedeldetý úshin QR-kod pen tsıfrlyq pasport engizildi
ASTANA. KAZINFORM — Qazaqstanda júk kólikteriniń shekaradan ótýin jeńildetý úshin QR-kod pen júk tasymaldaýdyń tsıfrlyq pasporty engizildi. Bul týraly Astanada ótip jatqan New Silk Way halyqaralyq forýmynda Kólik vıtse-mınıstri Damır Qojahmetov málimdedi.
Onyń aıtýynsha, Kólik mınıstrligi júk tasymalyn tsıfrlandyrý aıasynda Smart Cargo platformasyn jáne logıstıkany baqylaý ortalyǵyn quryp jatyr. Jańa júıe shekaradan júk ótkizýdi jeńildetýge baǵyttalǵan.
— Smart Cargo jobasy aıasynda QR-kodty, biryńǵaı pasportty jáne júk tasymaldaýdyń tsıfrlyq pasportyn engizdik. Qazirdiń ózinde alǵashqy nátıjeler bar. Búginge deıin 11 myńǵa jýyq júk tasymalynyń tsıfrlyq pasporty rásimdeldi. Sonymen qosa, platformaǵa 15 myńnan astam kólik pen tasymaldaýshy tirkeldi, — dedi vıtse-mınıstr.
Damır Qojahmetovtiń aıtýynsha, Smart Cargo kólik salasynda júzege asyrylyp jatqan iri tsıfrlyq jobalardyń biri. Mınıstrlik jasandy ıntellektini júk aǵynyn baqylaýǵa, tasymal úderisterin taldaýǵa jáne derekterdi óńdeýdi jedeldetýge paıdalanýdy kózdep otyr.
Vıtse-mınıstr 2026 jyly kólik salasynda jasandy ıntellektini qoldanýǵa baǵyttalǵan birneshe iri joba qolǵa alynǵanyn atap ótti.
Olardyń alǵashqy nátıjeleri qazirdiń ózinde belgili bolyp, birqatar jobanyń tıimdiligi synaqtan ótkizilip jatyr.
Aıta óteıik, elordada Qazaqstannyń Kólik aptalyǵy aıasynda «NEW SILK WAY» VIII halyqaralyq bıznes-forýmy ótip jatyr. Bıylǵy is-shara Qazaqstan men 39 ózge memleketten kelgen ókilderdiń basyn qosty. Jıynǵa memlekettik organdardyń, halyqaralyq uıymdardyń, kólik-logıstıkalyq kompanııalardyń, salalyq birlestikter men sarapshylar qaýymdastyǵynyń 2 000-ǵa jýyq ókili qatysady dep kútilýde. Qatysýshylar qatarynda 338 uıymnyń ókilderi bar.
Eske salaıyq, buǵan deıin Qazaqstan júk tasymalyn JI arqyly basqarýdy josparlap otyrǵany habarlandy.
