Qazaqstanda júk kólikteriniń jol aqysy ózgerýi múmkin: jańa tásilder usynyldy
ASTANA. KAZINFORM — Qazaqstanda kommertsııalyq júk kólikteriniń aqyly joldardy paıdalanǵany úshin tólem tártibin jetildirý usynyldy. Jańa bastamalar tarıfterdi saralaýdy, jyldyq abonement engizýdi jáne sheteldik tasymaldaýshylarǵa qatysty tólem tetikterin qarastyrýdy qamtıdy. Jeke jeńil kólik ıeleri úshin eshteńe ózgermeıdi. Bul týraly Úkimet málim etti.
Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen avtomobıl joldarynda aqy tóleý jónindegi jumys tobynyń birinshi otyrysy ótti. Qatysýshylar jol alymdarynyń qoldanystaǵy júıesin jetildirý jáne jol ınfraqurylymyn kútip ustaý men jóndeýdi qarjylandyrýdyń turaqtylyǵyn arttyrýdy qarady.
Kommertsııalyq júk kóliginiń, onyń ishinde otandyq jáne sheteldik tasymaldaýshylardyń jol aqy tóleýdegi yqtımal tásilderine basty nazar aýdaryldy. Bul rette usynylyp otyrǵan sharalar azamattardyń jeke jeńil kóligi úshin jol júrý shartyn ózgertýdi kózdemeıdi.
— Biz avtomobıl joldaryn salǵanymyzben, olardy kútip ustaý jáne jóndeý shyǵynyn bıýdjet esebinen jabýdy jalǵastyrýdamyz. Jol ınfraqurylymy ózin qamtamasyz etetin júıeni qurý qajet, — dep atap ótti Serik Jumanǵarın.
Otyrys barysynda jumys toby birqatar bastama usyndy. Saqtandyrý salasyndaǵy táýelsiz sarapshy Áıgerim Qarabyıykoglý Qazaqstan men kórshi memleketterdiń aqyly jol tarıfindegi aıyrmashylyqqa nazar aýdardy. Osyǵan baılanysty jol aqysyn aımaqtyq deńgeıge jaqyndatý múmkindigin zertteýdi, sondaı-aq otandyq tasymaldaýshylar úshin bólek shart qarastyrýdy usyndy.
Sonymen qatar sarapshy memlekettik shekaradan ótý kezinde sheteldik júk avtomobılderin saqtandyrý tetigin pysyqtaýdy usyndy. Onyń pikirinshe, bul tásil júk kóliginiń jol ınfraqurylymyna áserin óteýdiń qosymsha quraly, sondaı-aq ony kútip ustaý men jóndeýdi qarjylandyrý kózi bola alady.
«QazAvtoJol» UK» AQ bıznes-taldaýshysy Farhad Nurkamalov kólik kompanııalary úshin jyldyq abonementterdi engizý múmkindigin qarastyrýdy aıtady. Mundaı tetik tasymaldaýshylarǵa josparly shaqyrymdy aldyn ala tóleýge jáne uzaq sapar kezindegi úlken shyǵyndy ońtaılandyrýǵa múmkindik beredi. Sonymen qatar bul tólemder jıyntyǵynyń joǵarylaýyna jáne qaryzdyń azaıýyna yqpal etýi múmkin.
Taǵy bir usynys kólik quraldarynyń sıpattamalaryn eskere otyryp, tarıfterdi jetildirý boldy. VIII saılanǵan QR Parlamenti Májilisiniń depýtaty, logıstıka jáne kólik salasyndaǵy sarapshy Bolatbek Nájimetdınuly avtomobılderdiń ekologııalyq synybyna, shyǵaryndylar deńgeıine jáne jol tósemine júktemege baılanysty tarıfterdi saralaýdy usyndy.
Sondaı-aq qatysýshylar júk tasymalynyń ashyqtyǵyn arttyrý jáne jol aqysyn tóleý talabyn saqtaý máselesin talqylady. Atap aıtqanda, júk kóligi qozǵalysyn, onyń ishinde avtomobıl jolynyń aqyly ýchaskelerinde monıtorıng júrgizý úshin tsıfrlyq quraldardy qoldanýdy arttyrý usynyldy.
Otyrys qorytyndysy boıynsha vıtse-premer memlekettik organdarmen, salalyq qaýymdastyqtarmen jáne bıznes ókilderimen birlesip, usynystardy egjeı-tegjeıli pysyqtaýdy tapsyrdy.
Tásilderdi zerdeleý kezinde tasymaldaýshylar men bıznestiń múddesin eskerý, sondaı-aq jol ınfraqurylymyn ustaýǵa arnalǵan shyǵystardy ádil bólýdi qamtamasyz etý qajet. Bul rette azamattardyń jeke jeńil kóligine áser etpeı, kommertsııalyq júk kóligine basty nazar aýdarý usynylady.
Usynystardy qarashanyń sońyna deıin ázirlep, jumys tobynyń kelesi otyrysynda qaraý tapsyryldy.
