Qazaqstanda júk kólikteriniń ótkizý pýnktterinen ótý ýaqyty 30 mınýttan aspaýy tıis – mınıstr

Onyń aıtýynsha, Kólik mınıstrligi «Digital Qazaqstan» strategııasy aıasynda júkterdi tıimdi tasymaldaý, joldardy saqtaý jáne azamattar men bızneske kórsetiletin qyzmetterdiń ýaqytyn qysqartýǵa baǵyttalǵan tsıfrlyq jobalardy júzege asyryp jatyr.

– 7-shi baǵyt boıynsha negizgi ındıkatorlar belgilendi. Ótkizý pýnktterinen júk kóliginiń ótý ýaqyty 30 mınýttan aspaýy kerek. Tsıfrlyq pasporty bar jáne júkterdi marshrýt boıy baqylaý kólemi artady. Bul kórsetkish bıyl 20 paıyz, 2027 jyly 60 paıyz, 2028 jyly 80 paıyz bolady, – dedi mınıstr.

Nurlan Saýranbaevtyń aıtýynsha, baǵdarlama aıasynda Smart Cargo jáne e-Kólik jobalary iske asyrylyp jatyr. Smart Cargo platformasy 58 derekkózdi biriktiredi. Júıe halyqaralyq júkterdi jolǵa shyqqan sátten bastap mejeli jerge jetkenge deıin qadaǵalaýǵa múmkindik beredi.

– «Nur Joly» ótkizý pýnktinde tasymaldyń tsıfrlyq pasporty iske qosyldy. Qaǵaz talonnyń ornyna biryńǵaı QR-kod qoldanylady. Búginde 11 myńnan astam tsıfrlyq pasport rásimdeldi. Nátıjesinde júk ótkizý jyldamdyǵy 30 paıyzǵa artty, – dedi ol.

Mınıstrdiń málimetinshe, «Nur Joly – Qorǵas» baǵytynda kezekti kútý ýaqyty 10 ese qysqarǵan. Kelesi kezeńde Smart Cargo platformasyn basqa aqparattyq júıelermen ıntegratsııalaý josparlanyp otyr.

Sonymen qatar e-Kólik júıesi kólik salasyndaǵy barlyq tsıfrlyq sheshimderdi biriktiretin orta retinde qalyptastyrylady. Júıe jasandy ıntellekt tehnologııalaryn qoldanady.

Kólik salasyn senimdi derektermen qamtamasyz etý úshin Smart Data Transport derekter bazasy quryldy. Qazirgi ýaqytta oǵan 9 derekkózi qosylǵan. Aldaǵy ýaqytta olardyń sanyn 40-qa deıin jetkizý josparlanyp otyr.

– Jasandy ıntellekt derekter negizinde kólik jelisiniń 100 paıyzyn taldaýdy jáne baqylaýdy qamtamasyz etedi, – dedi Nurlan Saýranbaev. 

Aıta keteıik, elimizde kólik júıesi qalaı ózgerip jatqanyn jazǵanbyz.