Qazaqstanda júk kóligin shyǵaratyn zaýyt ashylady
ASTANA. KAZINFORM - Qazaqstan–Qytaı dóńgelek ústeli barysynda qytaılyq jáne qazaqstandyq kompanııalar arasynda Qazaqstanda júk kóligin shyǵarý boıynsha birlesken kásiporyn qurý týraly kelisimge qol qoıyldy, dep habarlaıdy Úkimettiń baspasóz qyzmeti.
Zaýyt Qaraǵandy oblysynyń Saran qalasynda ornalasatyn bolady.
«Birlesken kásiporyn qurý týraly kelisimge qol qoıyldy. «Saran» ındýstrııalyq aımaǵynyń bazasynda júk jáne kommertsııalyq tehnıka óndiretin jańa zaýyt salynady. Jańa kásiporyn qurý bizge qosymsha 1,5 myń jumys ornyn ashýǵa múmkindik beredi. Sondaı-aq biz jańa tehnologııalardy alamyz, dánekerleý, kataforez, boıaý jáne shaǵyn torapty qurastyrý úshin zamanaýı jabdyqtar satyp alynady. Jas ınjenerler Qytaıda qoldanylatyn jańa daǵdylardy ıgerýge múmkindik alady», — dedi birlesken jobanyń jetekshisi Arǵulan Maıqonov.
Osyǵan deıin Qazaqstan Respýblıkasynyń Premer-mınıstri Oljas Bektenov Qytaı Halyq Respýblıkasyna jumys sapary aıasynda bıznes ókilderiniń qatysýymen ótken Qazaqstan-Qytaı ınvestıtsııalyq dóńgelek ústeline qatysty. Kezdesý nátıjesinde jalpy somasy 2,5 mlrd dollardy quraıtyn 8 kommertsııalyq kelisimge qol qoıyldy.
