Qazaqstanda JRVI-di anyqtaýdyń tıimdi júıesi engizildi
ASTANA. 11 qańtar. QazAqparat - QR Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıteti Qazaqstanda tumaýdyń, tumaýǵa uqsas aýrýlardyń (JRVI) qozdyrǵyshtarynyń aınalysyn anyqtaý jáne vırýstyń jańa epıdemıologııalyq qaýipti shtammdaryn anyqtaý úshin olardy epıdemıologııalyq qadaǵalaýdyń jetkilikti tıimdi júıesi engizilgenin habarlaıdy.
Asa qaýipti ınfektsııalardyń, onyń ishinde qus tumaýynyń da Qazaqstan Respýblıkasynyń aýmaǵyna ákelinýi men odan ári taralýynyń aldyn alý maqsatynda 36 sanıtarılyq-karantındik pýnkt (budan ári - SKP) táýlik boıy jumys isteıdi.
«Halyqaralyq áýejaılarda dene qyzýy joǵary adamdardy baılanyssyz anyqtaý maqsatynda 40 teplovızor ornatylǵan jáne 66 pırometr bar. Tumaýǵa jáne basqa da asa qaýipti ınfektsııalarǵa kúdikti naýqastar anyqtalǵan jaǵdaıǵa arnalǵan is-sharalar jospary men habarlandyrý shemasy bekitilgen. Oblystardyń, Astana men Almaty qalalarynyń sanıtarııalyq-epıdemıologııalyq saraptama ortalyqtarynyń quramynda jumys isteıtin ulttyq referens-zerthana men 16 vırýsologııalyq zerthana tumaý vırýstaryn zerthanalyq dıagnostıkalaýdy júzege asyrady», - delingen Densaýlyq mınıstrligi taratqan aqparatta.
Vedomstvonyń atap ótýinshe, asa qaýipti qozdyrǵyshtardy týdyratyn aýrýlar boıynsha qolaısyz elderden kelgen jolaýshylarǵa turaqty monıtorıng júrgiziledi. Mysaly, 2013 jyldyń 19 sáýirinen bastap 2014 jylǵy 10 qańtar aralyǵynda QHR-nan 102 207 jolaýshy keldi, kelgen jolaýshylardyń arasynda ınfektsııalyq aýrýlarǵa kúdikti adamdar anyqtalǵan joq.
Dúnıejúzilik densaýlyq saqtaý uıymynyń derekterine sáıkes A(H5N1) qus tumaýy boıynsha Bangladesh, Qytaı, Egıpet, Úndistan, Kambodjı, Indonezııa jáne Vetnam, koronovırýs boıynsha Taıaý Shyǵys elderi endemııalyq bolyp tabylady.
