Qazaqstanda joıylyp ketken qulandardyń sany qalaı kóbeıip keledi
ALMATY. QazAqparat - Almaty zoobaǵy men Altynemel ulttyq tabıǵı parki Prjevalskıı jylqysy - qulannyń sanyn kóbeıtý úshin barlyq sharany júzege asyryp jatyr, dep habarlaıdy QazAqparat tilshisi.
2009 jyly Almaty jáne Mıýnhen zoobaqtary men Altynemel ulttyq tabıǵı parki arasynda qulan popýlıatsııasyn taralý arealynda qalpyna keltirý úshin arnaıy kelisimge qol qoıylǵan bolatyn.
«2018 jyly zoobaq pen qoryq arasynda taǵy qosymsha kelisimshart jasaldy. 11-12 jeltoqsanda zoobaqqa qoryqtan birneshe qulan jetkizildi. Olardyń ishinde azdap qolǵa úıretilgeni jáne jabaıysy da bar. Bul janýarlarmen almatylyqtar da jaqynyraq tanysty», - dedi baspasóz qyzmetinen.
Barlyǵy Mıýnhen zoobaǵynan Almatyǵa 10 jyl buryn 7-8 qulan ákelingen bolatyn.
Olar shamamen bir jyldaı zoobaqta jergilikti jerge beıimdelý protsesinen ótip, qalpyna keldi. Janýarlar alǵashqy tólderin bere bastady. 2010-2016 jyldar arasynda qulandardyń tabyny edáýir ósken.
Jersindirý protsesinen soń jylqylar Altynemel qoryǵyna jiberildi.
2018 jyldyń jeltoqsan aıynda qoryqtan zoobaqqa kezinde Mıýnhen asyp kelgen qulandardyń ósip ketken 3-4 tóli qaıtadan jetkizildi.
«Bul osy arada júzdegen jyl buryn mekendegen janýar týraly adamdar bilse degen nıetpen jasalady. Bul Qazaqstan jerinde joıylyp ketken janýardy qaıta qaıtarýǵa qajetti «materıal» desek te bolady. 2019 jyly da Almaty zoobaǵyna birneshe qulan jetkizilýi tıis», - dedi zoobaqtyń baspasóz qyzmetinen.
