Qazaqstanda joıýǵa jatatyn 2 myńnan astam ıesiz gıdrogeologııalyq uńǵyma bar
NUR-SULTAN. QazAqparat – Elimizde 2 myńnan astam ıesiz gıdrogeologııalyq uńǵymalardy joıý qajet. Bul jaıynda Májilis depýtattarynyń saýalyna QR Premer-Mınıstriniń orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.
«Jerasty sýlary jeke sý tutynýshylar úshin úlken mańyzǵa ıe (mysaly, aýyz sýmen jabdyqtaý) jáne ıesiz ózdiginen aǵatyn gıdrogeologııalyq uńǵymalardyń qazirgi problemasy ózekti jáne tıisti sharalar qabyldaýdy talap etedi. Zertteý derekterine sáıkes, tutastaı respýblıka boıynsha tuşy jerasty sýlarynyń tabıǵı resýrstaryna, qorshaǵan ortaǵa-aýmaqtyń tuzdanýy men batpaqtanýy, ósimdikterdiń ólýi, jasandy sý aıdyndarynyń, bulaqtar men jyralardyń paıda bolýy nátıjesinde jer qoryna orny tolmas zalal keltiretin, sondaı-aq jerasty jáne jerústi sýlaryn fenoldarmen, radıoaktıvti jáne ýly elementtermen lastaıtyn 2 myńnan astam ıesiz ózdiginen aǵatyn gıdrogeologııalyq uńǵymalar joıylýǵa jatady», - dedi Roman Sklıar.
Onyń dereginshe, buǵan deıin «Eldiń mıneraldyq-shıkizat kesheniniń resýrstyq bazasyn damytýdyń 2003-2010 jyldarǵa arnalǵan baǵdarlamasyn» iske asyrý aıasynda ózdiginen tógiletin 518 gıdrogeologııalyq uńǵymany joıý boıynsha jumystar júrgizilgen.
