Qazaqstanda Joshy han týraly serıaldyń túsirilimi jýyrda bastalady
ASTANA. KAZINFORM – Karga Seven Pictures-ten jobanyń atqarýshy prodıýseri jáne rejısseri Emre Shahın, prodıýser Fıkret Manoglý jáne qoıýshy-sýretshi Zekı Saraıoglý memlekettik keńesshi Erlan Qarınmen jeke kezdesip, Altyn Ordanyń negizin qalaýshy Joshy han týraly shaǵyn serıaldyń túsirilimi barysyn talqylaý úshin Qazaqstanǵa keldi. Bul týraly kıno mamandary jelidegi paraqshasynda jazdy.
Prodıýserlik kompanııanyń ókilderi stsenarıı boıynsha jumystyń aıaqtalǵanyn habarlady, ony ázirleýge belgili jazýshy Djastın Pollard («Vıkıngter») jáne Kler Mýrsom (Korol vne zakona), sondaı-aq qazaqstandyq jáne halyqaralyq tarıhshylar men sarapshylar qatysty.
Sondaı-aq olar stsenarııdi ázirleý kezinde Joshy ulysynyń, Altyn Ordanyń tarıhyn, sonymen qatar kóshpeli halyqtar men qazaqtyń mádenı qundylyqtary men ómir saltyn zertteý júrgizilgenin málim etti.
Búginde túsirilim oryndaryn izdeý aıaqtaldy jáne kastıng júrip jatyr. Serıaldyń túsirilimi jaqyn arada bastalady dep josparlanyp otyr.
Eske sala ketsek, sáýirde Joshy han týraly jazylǵan tuńǵysh tarıhı romannyń tanystyrylymy ótetinin habarlaǵan edik.
Jýyrda áleýmettik jeli qoldanýshysy Joshy han kesenesiniń qazirgi jaǵdaıy týraly jazba jarııalap, tarıhı dúnıege kóńil bólý qajettigin aıtqan edi. Fotodan baıqasaq, ǵımarattyń irgetasyn ylǵal basqany kórinedi. Osyǵan oraı Joshy han kesenesiniń búgingi jaǵdaıy men kútip-baptaý jumystary týraly Mádenıet jáne aqparat mınıstrliginen surap bildik.
